Ruwan rake na ɗaya daga cikin shahararrun ruwan sha na asali (natural) da ake samu a ƙasashe masu zafi, musamman a Afirka da Asiya. Ana tace shi ta hanyar taunawa ko amfani da na’ura, kuma mutane na jin daɗinsa saboda ɗanɗano mai daɗi da kuma ƙarfinsa na ba jiki kuzari. Bayan ɗanɗano, ruwan rake na ɗauke da fa’idoji masu yawa ga lafiyar ɗan Adam idan aka sha shi cikin tsari, tsafta da kuma gwargwado, in ji Dr. Bashir Jamilu, babban likita a asibitin koyarwa na jihar Katsina.
Babban amfanin ruwan rake shi ne samar da kuzari cikin gaggawa. Yana ɗauke da sikari na asali kamar su sucrose, glucose da fructose, waɗanda ke taimakawa wajen dawo da ƙarfi, rage gajiya da kuma sa jiki ya kasance cikin kuzari. Wannan na sa ruwan rake ya dace da mutanen da ke yin aikin wahala ko masu murmurewa daga rashin lafiya.
- Basaraken Da Aka Sace A Kogi Ya Kuɓuta Bayan Shafe Kwanaki 27 A Hannun ‘Yan Bindiga
- Manoman Rake Sun Tabka Asarar Kimanin Naira Biliyan Biyu A Kano
Haka kuma, ruwan rake na taimakawa lafiyar narkewar abinci. Yana ɗauke da sinadaran fibre da potassium waɗanda ke sauƙaƙa narkewar abinci da hana matsalar maƙarƙashiya, tare da rage raɗaɗin ciki da ƙuna idan aka sha shi sabo kuma ba tare da ƙazanta ba.
Bugu da ƙari, Dr. Bashir ya ce ruwan rake na taimakawa jiki wajen samun isasshen ruwa da kuma fitar da gubar jiki. Yana ɗauke da sinadarai kamar calcium, magnesium, iron da zinc, waɗanda ke tallafa wa hanta da ƙoda wajen tsarkake jiki. Duk da haka, ana shawartar masu ciwon sukari da su sha rake bisa ƙima, tare da tabbatar da tsaftar shiri ta hanyar wanke rake ko fere shi domin kare lafiyar masu sha.
Discussion about this post