Mutum 2 Sun Shiga Hannu Kan Yi Wa Mace Kurma Fyade A Jihar Nasarawa 

Rundunar ’yansandan Jihar Nasarawa ta kama wasu mutum biyu da ake zargi da yi wa wata yarinya kurma mai shekara 15 fyade da karfin tsiya.

Kakakin rundunar a jihar, DSP Ramhan Nansel ne ya tabbatar da kamen a cikin wata sanarwa ranar Juma’a.

• Kasar Sin Ta Nuna Adawa Da Yadda Amurka Ta Kara Sanyawa Kamfanonin Sin Takunkumi
• Mayakan Boko Haram 443 Sun Mika Wuya Yayin Da ISWAP Ta Kashe Musu Sama Da Mutum 300

Ya ce wadanda ake zargin sun yi amfani da kasancewar yarinyar kurma wajen aikata mata fyaden.

Ramhan ya ce, “A ranar biyu ga watan Maris, 2023, da misalin karfe 6:30, an kawo mana kara a ofishin rundunarmu da ke Karamar Hukumar Obi, cewa wani mai suna Aminu Hashim mai shekara 24 da kuma wani Lukman Dogara, mai shekara 18, mazauna titin Owolosho da ke Karamar Hukumar Obi ta Jihar Nasarawa, sun hada baki wajen yi wa yarinya mai shekara 15 fyade.

“Bayan samun korafin, sai jami’anmu na yankin suka dukufa bincike da farautar wadanda ake zargi da aika-aikar.

“Binciken farkeo-farko ya nuna cewa wadanda ake zargin sun yaudare rarinyar wacce take da larurar ji zuwa gidansu da ke kan layin Okpe a Karamar Hukumar Obi, inda suka yi mata fyaden.”

Kakakin ’yansandan ya kuma ce nan take aka garzaya da wacce aka yi wa fyaden zuwa asibit domin a duba lafiyarta.

Ya ce tuni Kwamishinan ’yansandan Jihar, Maiyaki Baba, ya bayar da umarnin zurfafa bincike a kan lamarin.

Ya ce da zarar bincike ya kammala za a tura su gaban kuliya don fuskantar shari’a.