Hukumar da ke shirya gasar Premier Football League ta Nijeriya (NPFL) ta sanar da cewa za a fara buga wasu wasannin gasar a ranakun Juma’a, maimakon tsarin da aka saba na buga wasanni a Asabar da Lahadi kawai. Sabon tsarin zai fara aiki nan da makonni biyu, yayin da za a kuma fara wasu wasannin Asabar da Lahadi da wuri fiye da yadda aka saba.
Za a fara amfani da sabon tsarin ne a makon wasa na tara na kakar bana, inda Shooting Stars za ta karɓi baƙuncin Ranchers Bees a filin wasa na Lekan Salami, Adamasingba, Ibadan, ranar Juma’a, 16 ga Oktoba. Za a fara wasan da misalin ƙarfe 6:00 na yamma.
Wannan zai kasance karo na biyu da Shooting Stars za ta buga wasan NPFL a ranar Juma’a a wannan kakar. A wasan farko da ta buga a wannan rana, ƙungiyar ta Ibadan ta doke Inter Lagos da ci 2-1 a gidanta.
Hukumar ta ce sabon tsarin zai taimaka wajen samar da daidaito da kuma bai wa ƙungiyoyin damar gudanar da shirye-shiryensu cikin sauƙi da natsuwa. Ta ƙara da cewa tsarin ya yi daidai da yadda ake tsara wasanni a wasu manyan gasannin ƙwallon ƙafa na duniya.
