Tsohon gwamnan jihar Kaduna sanata Ahmed Muhammed Makarfi ya shelanta cewa, jam’iyyar PDP za ta kori jam’iyyar APC daga kan karagar mulkin jihar a zaben gwamna na 2023 da ke tafe.
Makarfi wanda ya taba rike mukamin shugabancin rikon kwarya na PDP na kasa a hirarsa da manema labarai a Kaduna ya ce, APC babu wani aiki da za ta yi wa ‘yan jihar illa ta sake jefa rayuwarsu cikin fatara da kuncin rayuwa.
A cewarsa, PDP ce daya tilo da ba ta nuna wani babbancin addini ko na kabilanci sabida jam’iyya ce ta ko wanne jinsi da ke kasar nan.
Makarfi ya cigaba da cewa, ya kasa ya tsare ne a jihar domin ganin PDP ta sake karbar madafun iko na shugabancin jihar, inda ya ce, hakan ne ya sa bai samu damar bin dan takarar shugaban kasa a jam’iyyar PDP Alh. Atiku Abubakar zuwa jihohin kasar nan yakin neman zabe ba.
Ya ce, dari bisa dari ina goyon bayan takarar jama’iyyata, Atiku Abubakar, ba na zuwa wajen yakin neman zaben Atiku ne don naga PDP ta sake karbar madafun iko a zaben 2023 a jihar Kaduna.
Makarfi ya ce, muna ci gaba da tuntubar jama’ar jihar kuma ina da yakinin PDP za ta lashe zaben 2023 a jihar Kaduna da kuma kasa baki daya.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
