Rikicin Isra’ila Da Falasdinu: Majalisar Dinkin Duniya Ta Yi Kiran Taron Gaggawa

Kwamitin Tsaro na Majalisar Dinkin Duniya ya yi wani taron gaggawa don tattaunawa kan rikicin da ke faruwa tsakanin Isra’ila da Falasdinawa a Zirin Gaza.

Jakadan Majalisar mai kula da al’amuran Gabas ta Tsakiya, Tom Wenneslan, ya yi gargadin cewa, tsagaita wutar da bangarorin biyu suka yi ba mai dorewa ba ne.

• Da Dumi-Dumi: Sojoji Sun Cafke Wadanda Suka Kai Hari Cocin Owo

Don haka, dole ne a nemo mafita a siyasance kafin bangarorin biyu su sake komawa filin daga Wanda hakan ba zai bada damar lalubo mafita a siyasance ba.

Jaridar Aminiya ta ruwaito cewa, Jakadan Rasha Vasisily Nebenzia a taron, ya nuna damuwarsa na tabarbrewar rikicin, wanda ya ce hakan na iya haifar da babbar matsala ta jinkai da yanzu ake fama da ita a zirin Gaza.

Akalla Falasdinawa 44 wadanda yawancinsu fararen hula ne da kuma yara 15 ne suka rasa rayukansu a lokacin da Isra’ila ta soma ruwan bama-bamai a wuraren da kungiyar Islamic Jihad ta ke a yankin Gaza, a ranar Juma’a.