Sarkin Musulmi Ya Nuna Baƙin Ciki Kan Kisan Kiyashi A Binuwe

Jama’atu Nasril Islam (JNI), ƙarƙashin jagorancin Sarkin Musulmi, Alhaji Sa’ad Abubakar, ta bayyana irin baƙin ciki da tashin hankalin da Sarkin Musulmi Ya shiga game da sake samun kisan kiyashi a wasu sassan jihar Binuwe.

A wata sanarwa da Sakataren JNI, Farfesa Khalid Abubakar Aliyu ya fitar, an bayyana cewa Sarkin Musulmi ya yi Allah wadai da wannan mugun aiki, inda ya bayyana kisan gillar a matsayin wanda bai dace da halin ɗan Adam ba kuma ya saɓawa dukkan ƙa’idojin addini.

• Sojoji Sun Kashe Na Hannun Daman Bello Turji A Sokoto
• Ya Kuɓuta A Hannun ‘Yan Bindiga Bayan Shafe Kwanaki 8 Yana Gudu A Dajin Sokoto Da Neja

JNI ta yi tambaya game da dalilin da yasa har yanzu ba a iya kawar da irin wannan tashin hankalin ba, yayin da aka yi kira ga hukumomi da su daina kasancewa masu jiran abin da zai faru kafin su ɗauki matakin kariya. Ƙungiyar ta kuma nuna rashin gamsuwa da yadda jami’an tsaro sukan iso wurin da laifuka suka riga suka faru.

A yayin da JNI ta amince da ƙoƙarin da jami’an tsaro ke yi, ta kuma yi kira ga dukkan ɓangarori da su haɗa kai don kawo ƙarshen wannan rikici. Ta buƙaci gwamnati, masu addini, ƙungiyoyin farar hula, da shugabannin al’umma su taka rawar gani wajen hana irin wannan tashin hankali.

“Ya isa! Yin shiru ko kuma rashin kula da lamarin na iya ƙara ƙarfafa wa ƴan ta’add,” in ji sanarwar. JNI ta kuma tunatar da cewa rayukan mutane masu tsarki ne kuma dole ne a kiyaye su bisa dukkan ƙa’idojin addini da na ɗan Adam.