Dakarun rundunar sojin Nijeriya sun samu nasarar ceto mutane 21 da aka yi garkuwa da su a Jihar Neja, bayan fafatawa da wasu da ake zargin ’yan ta’adda ne.
An ceto mutanen ne a ranar 9 ga Nuwamba, 2026, ta hannun dakarun Birget ta 18 ta rundunar soji, bayan sun gudanar da sintiri na yaƙi sakamakon samun bayanan sirri kan ayyukan ’yan ta’adda a ƙauyukan Abaha da Sabon Wuri.
Rundunar sojin ta bayyana cewa dakarun sun yi musayar wuta mai zafi da waɗanda ake zargin ’yan ta’addan ne, lamarin da ya tilasta musu tserewa zuwa wani daji da ke kusa, wasu daga cikinsu kuma ana zargin sun samu raunukan harbin bindiga.
A cikin wata sanarwa da Mukaddashin Mataimakin Daraktan Hulɗa da Jama’a na Birged ta 18, Kyaftin Adebayo Samuel Adewumi, ya fitar a ranar Talata, rundunar ta ce an ceto dukkan mutanen 21 ba tare da sun samu rauni ba.
Rundunar sojin ta ce dakarunta sun ƙara tsaurara sintiri da ayyukan kwanton bauna domin bin sawun waɗanda suka tsere.
Ta kuma buƙaci mazauna Ƙaramar Hukumar Mariga da maƙwabtan ƙananan hukumomi da su kai rahoton duk wanda ake zargin yana da raunin harbin bindiga ko kuma duk wani motsi da ya ba su shakku ga hukumar tsaro mafi kusa.
