A kalla ‘yan fashin daji hudu ne sojoji suka kashe a yayin wani harin share maboyar ‘yan bindiga da suka kaddamar a Tsohon Gayan da ke cikin karamar hukumar Chikun a jihar Kaduna.
A wata sanarwar manema labarai da kwamishinan kula da harkokin tsaron cikin gida na jihar Kaduna, Samuel Aruwan ya fitar, ya yi bayanin cewa sojojin sun bi sawun ‘yan bindigan da ke arcewa.
Aruwan ya kara da cewa ‘yan ta’addan biyu sun mutu a artabun, sannan wasu sahihan bayanai sun tabbatar da cewa wasu karin biyu su ma sun mutane sakamakon harbin da bindigogi suka samu daga sojojin.
Sanarwar ta ce bayanan sahihai sun ce biyu daga cikin hudu na ‘yan ta’addan da aka kashe su ne Dogo Mallam da kuma Bello Mallam.
Ya kara da cewa sojojin sun samu nasarar kwato bindiga kirar AK47, wata bindigar ta daban tare da Alburusai 22 hadinda Babur guda a hannun ‘yan ta’addan.
Gwamnan Jihar Kaduna, Nasir El-Rufai, ya nuna gamsuwarsa bisa rahoton tsaro da ake samu a jihar, ya jinjina wa kokarin sojojin na dakile aniyar ‘yan bindiga da ‘yan fashin daji gami da irin nasarorin da ake samu.
Kwamishinan ya cigaba da cewa za a Kara himma da azama wajen cigaba da share ‘yan ta’addan a duk inda suke fakewa har sai an ga bayansu gaba daya.
