Tsibirin Ciniki Maras Shinge Na Hainan Na Ci Gaba Da Jawo Hankalin Jarin Waje

Aikin gina tsibirin ciniki maras shinge na Hainan na kasar Sin ya samu gagarumin ci gaba sosai, inda gwamnatin kasar Sin ta sanar a jiya cewa, a ranar 18 ga watan Disamban bana, za a kaddamar da manufar kafa “kwastam mai zaman kansa a duk faɗin tsibirin ciniki maras shinge na Hainan” a hukumance, wadda ke nufin saukaka bincike da ragewa ko soke haraji. “Ana iya cin moriyar manufofin ba da fifikon harajin kudi a tsibirin Hainan”, sannan “mu’amalar Hainan da kasashen duniya za ta kasance cikin ’yanci da lumana”. A ra’ayin jama’a na kasa da kasa, wannan wani muhimmin mataki ne ga kasar Sin na kara fadada bude kofa ga ketare, wanda ba bunkasa ci gaban tattalin arzikin kasar kadai zai yi ba, har da samar da damammaki ga duniya.

Ga kasar Sin, gina tsibirin ciniki maras shinge na Hainan wata babbar manufa ce ta kasa, wadda ke nuna matsayin koli na bude kofa ga kasashen duniya.

Bayan aiwatar da manufar, duk tsibirin Hainan zai zama yanki na musamman a karkashin kulawar hukumar kwastam, za a aiwatar da manufofi mafi ’yanci kuma masu sauki, da za su shafi fannoni guda hudu, wato, manufar soke harajin kayayyaki, matakan saukaka harkokin kasuwanci, matakan zirga-zirga masu dacewa da kuma tsarin sa ido mai inganci.

Dauki manufar “soke haraji” a matsayin misali. Bayan manufar ta fara aiki a duk fadin tsibirin Hainan, za a fadada adadin kayayyakin da ba su da haraji daga 1,900 a yanzu zuwa kusan 6,600, wanda ya kai kusan kashi 74 bisa dari na dukkan rukunonin harajin kayayyaki, kuma ya karu da kashi 53 bisa dari idan aka kwatnta da yawan kayayyakin da ake shigowa kafin a aiwatar da manufar. Wannan zai rage dimbin kudaden da ake kashewa wajen shigowa da kayayyaki, da kara kuzarin yin kasuwanci, da kuma samar da riba ga masu sayayya da ’yan kasuwa. (Safiyah Ma)