Tunanin Mika Wa Ganduje Shugabancin Jam’iyyar APC, Kunar Bakin Wake Ce – Mataimakin Shugaban Jam’iyyar 

Mataimakin shugaban jam’iyyar APC na kasa reshen (Arewa-maso-Yamma) Malam Salihu Lukman, ya gargadi jam’iyyar game da zaben tsohon gwamnan jihar Kano, Dakta Abdullahi Ganduje, a matsayin wanda zai maye gurbin tsohon shugaban jam’iyyar na kasa, Sanata Abdullahi Adamu.

A cewarsa, matakin kamar kunar bakin wake ne da kuma tsantsar rashin nazari da ka iya tayar da zaune tsaye a jam’iyyar.

Gargadin na Lukman na zuwa ne sa’o’i 24 bayan da rahotanni suka bayyana cewa, shugaba Bola Ahmed Tinubu da gwamnonin APC na shirin amincewa da Ganduje a matsayin shugaban jam’iyyar na kasa bayan murabus din Adamu da sakataren jam’iyyar na kasa, Sanata Iyiola Omisore.