Wani mutum mai shekaru 60, Sabi’u Yusha’u, ya rasa ransa bayan ya faɗa cikin wata tsohuwar rijiya a unguwar CBN Quarters da ke kan titin Hadejia, Kano.
Hukumar kashe gobara ta jihar Kano ta tabbatar da faruwar lamarin, inda ta ce ta samu kiran gaggawa daga PFS II Sabo Wada Abdullahi da misalin ƙarfe 10:35 na dare.
- Gwamnatin Kano Ta Koka Kan Yawaitar Satar Magani A Asibiti
- Kawu Sumaila Ya Yi Barazanar Maka Shugaban NNPP Na Kano A Kotu
Jami’in hulɗa da jama’a na hukumar, Saminu Abdullahi, ya bayyana cewa tawagar ceto ta isa wurin da misalin ƙarfe 10:50 na dare. Sun samu Sabi’u Yusha’u cikin rijiya, amma yayin da aka ceto shi cikin rashin lafiya, an garzaya da shi zuwa Asibitin Sir Sunusi don duba lafiyarsa, inda likitoci suka tabbatar da mutuwarsa.
Bisa bayanan, wanda abin ya faru da shi, ya kasance direba ne inda bayan ya kawo wasu baki kusa da wurin da abin ya faru.
Yayin da ya fito daga mota domin yin fitsari, bai lura da akwai tsohuwar rijiya da tarkace a wurin ba. Lokacin da ya taka murfin rijiyar da ba ta da ƙarfi, sai ya faɗa ciki, wanda hakan ya yi sanadin mutuwarsa.
