Wike Ya Bada Umarnin Rushe Kasuwar ‘Yan Rafta A Abuja

Ministan babban birnin tarayya Abuja, Nyesom Wike, ya bayar da umarnin ruguza kasuwar ‘yan rafta da ke kan hanyar yankunan Mabushi, Jahi da Kado.

Wike ya ba da wannan umarni ne a Abuja a ranar Talata, lokacin da ya ziyarci yankin da aka fi sani da ‘Road N12’ a gundumar Mabushi da ke babban birnin tarayya Abuja.

• Muna Fatan Dawowa Kan Ganiyarmu – Eric Ten Hag
• Rashin Tsaro: Gwamnatin Katsina Ta Kaddamar Da Matasa ‘Yan Sa-Kai

Ya bayyana yankin, wanda ke bayan Unguwar Ministoci a gundumar Mabushi, a matsayin “barazana” ga tsaron birnin.

Yan rafta da aka fi sani da ‘Baban Bola’ sun mamaye yankin tare da makanikai da kafintoci.

Ministan, wanda ya samu rakiyar tawagar jami’an tsaro da kuma manyan jami’an hukumar kula da babban birnin tarayya Abuja, ya kara da cewa za a kara kaimi wajen ganin an kawar da masu aikata laifuka a birnin.

Ya ce ba za a bar irin wadannan rukunonin masu aikata laifuka a babban birnin tarayya Abuja ba.