Wasu ‘yan bindiga dadi sun kashe wani jami’in hukumar tsaron farin kaya ta NSCDC a jihar Ekiti.
Kazalika, sun kuma yi garkuwa da mutum uku a wani harin da ‘yan bindigar suka kai a kan hanyar Oke Aka zuwa Ajowa a karamar hukumar Ikole a ranar Asabar.
- ‘Yan Bindiga Sun Sace Amarya Da Dalibi A Katsina
- ‘Yan Bindiga Sun Sace Mutane Da Dama A Masallacin Juma’a A Zamfara
Jami’in da aka kashe mai suna, Segun Ayebulu, wanda aka ce yana kan hanyarsa ta zuwa Ado Ekiti daga garinsu a lokacin da suka ci karo da ‘yan bindigar.
‘Yan bindigar sun farmaki jami’an tsaron tare da kashe shi da yin garkuwa da kaninsa da ‘ya’yansa biyu da suke tare da shi a cikin motar.
Wata majiya daga yankin ta ce ‘yan farauta daga makwaftansu sun fara yunkurin shiga dazukan da ke yankin domin kokarin ceto wadanda aka yi garkuwa da su da kuma cafke wadanda suka aikata wannan danyen aikin.
