Wasu ‘yan bindiga dadi sun kashe mutum hudu a Nzomiwu da ke yankin Eziani a karamar hukumar Ihiala a Jihar Anambra.
An tattaro cewa ‘yan bindigan sun mamaye yankin ne a ranar Talata kuma suka fara harbin sama, inda a hakan suka kashe maza uku da mace daya wacce ma take dauke da juna biyu.
- Mun Biya Biliyan 173.2 Kudin Daidaita Farashin Man Fetur Cikin Shekara 4 – Gwamnati
- Dan Takarar Gwamnan PDP Ya Nemi Goyon Bayan Ma’aikata A Kaduna
Ba a iya gano dalilin kisan ba zuwa yanzu, amma wata majiya daga yankin na cewa ‘yan bindigan cikin gaggawa suka arce bayan da suka yi kisan.
Majiyar na cewa, harbin da ‘yan bindigan suka yi shi ne ya janyo kisan mutum hudu.
Da ya ke tabbatar da faruwar lamarin, kakakin ‘yan sandan jihar, DSP Tochukwu Ikenga, ya ce, gawarwakin mamata an kaisu zuwa dakin adana gawarwaki.
Ikenga ya na cewa, “Binciken ‘yan sanda da sojoji ya nuna cewa ‘yan bindigan sun yi amfani da bindiga kirar AK47 ne inda suka bude wuta ga jama’a, a sakamakon hakan harbin ya samu mutum hudu da suka mutu kuma an kai gawarwakinsu zuwa dakin adana gawarwaki.”
Ya tabbatar da cewa suna kan bincike domin gano maharan tare da daukan matakan cafke su.
