Rahotanni sun bayyana cewar Laftanar din soja ya rasa ransa sakamakon fashewar bam a garin Magza da ke kan iyakar Damaturu zuwa Biu a Jihar Borno.
Dakarun bataliya ta musamman ta 135 da ke Borno, sun yi sintiri ne zuwa Damaturu, babban birnin Jihar Yobe, inda wasu da ake zargin ‘yan tada kayar baya ne suka yi musu kwanton bauna.
- Shagulgulan Karamar Sallah: Me Aka Shirya Da Zai Bambanta Bara Da Bana?
- ’Yar Kasar Zambiya: A Nan Kasar Sin, Ina Jin Tamkar Ina Gida!
Wata majiya ta shaida wa manema labarai cewa jami’in ne kadai aka kashe a harin.
Ya bayyana cewa wasu sojoji hudu sun samu raunuka amma suna samun kulawa a wata cibiyar lafiya da ba a bayyana sunanta ba a Damaturu.
Wata majiyar kuma ta bayyana cewar dakarun rundunar sun yi nasarar dakile harin tare da kwato bindiga kirar AK-47 guda daya da alburusai da dama daga hannun maharan.
Har zuwa lokacin hada wannan rahoto, rundunar sojin ba ta ce komai game da harin ba.
Da aka tuntubi mai magana da yawun rundunar Operation Hadin Kai a Damaturu, Kyaptin Muhammad Shehu, ya ce zai yi cikakken bayani daga baya.
