Rundunar ’Yansandan Jihar Kogi, ta ceto mutane 15 da aka yi garkuwa da su a kan babbar hanyar Itobe zuwa Anyigba, a Ƙaramar Hukumar Ofu.
Daga cikin mutanen da aka ceto, har da jami’an Hukumar Kiyaye Haɗura ta Ƙasa (FRSC) guda biyu, a ranar Lahadi bayan jami’an tsaro sun yi musayar wuta da waɗanda suka yi garkuwa da su.
Rahotanni sun ce masu garkuwar sun tare wata motar bas ta kamfanin Peace Mass Transit da misalin ƙarfe 4 na yamma tsakanin Ojuwo Ajengo da Mamerebo, a kan hanyar Itobe zuwa Achigili.
Bayan faruwar lamarin, Kwamishinan ’Yansandan Jihar Kogi, CP Naziru Bello Kankarofi, ya bayar da umarnin gudanar da aikin haɗin gwiwa da ya haɗa da ’yansanda, Sojojin Najeriya, DSS, NSCDC, ’yan banga da sauran jami’an tsaro.
’Yan sandan sun ce an kashe wasu daga cikin maharan, yayin da wasu suka tsere zuwa cikin daji.
An kashe wani ɗan banga, yayin da wani ɗan sanda ya samu rauni a yayin aikin.
Mutanen da aka ceto sun haɗa da manya 12 da yara uku.
’Yansandan sun ce an same su da rai, sannan aka kai su asibiti domin duba lafiyarsu kafin a miƙa su wajen iyalansu.
Rundunar ta ce ana ci gaba da ƙoƙarin cafke maharan da suka tsere, sannan ta buƙaci mazauna yankin su riƙa bai wa jami’an tsaro sahihan bayanai kan abubuwan da ke faruwa.
