‘Yansanda Sun Dakile Harin ‘Yan Ta’adda, Sun Ceto Mutum 3 Da Aka Yi Garkuwa Da Su A Katsina

Rundunar ‘Yansandan Jihar Katsina sun dakile wani harin masu garkuwa da mutane a kauyen Gogalo da ke karamar hukumar Jibia ta jihar Katsina, tare da ceto wasu mutane uku da aka yi garkuwa da su.

Nasarar dakile shirin ‘yan ta’addar na kunshe cikin wata sanarwa da kakakin rundunar ‘Yansandan Jihar, ASP Aliyu Abubakar-Sadiq, ya fitar ranar Litinin a Katsina.

• ’Yansanda Sun Ceto Mutum 5 Da Aka Yi Garkuwa Da Su A Katsina
• Sojoji Sun Ceto Masu Yi Wa Kasa Hidima 2 Daga Hannun ‘Yan Bindiga A Katsina

“A ranar 11 ga watan Nuwamba, da misalin karfe 10:46 na dare, mun samu labari a ofishin ‘Yansanda na Jibia cewa, ‘yan bindiga dauke da muggan makamai kirar AK-47, suna ta harbe-harbe sun kuma farwa kauyen tare da yin garkuwa da mutum uku.

“Bayan samun wannan rahoton, jami’in ‘yan sanda na Jibia, nan take ya hada tawagar bincike don kai dauki a yankin da abun ya faru.

“Rundunar yi nasarar gano wadanda ake zargi da yin garkuwa da su.

“Dukkan wadanda aka yi garkuwa da su an yi nasarar ceto su ba tare da sun ji rauni ba. Ana ci gaba da kokarin kamo wadanda ake zargi da ci gaba da gudanar da bincike,” in ji Abubakar-Sadiq.