Rundunar ‘yansandan Jihar Kaduna ta ce jami’anta sun yi nasarar kashe wasu ‘yan bindiga guda biyu tare da kwato makamai da alburusai.
A wata sanarwa da DSP Mohammed Jalige ya fitar a ranar Juma’a, ya ce da misalin karfe 8:00 na ranar 12 ga watan Oktoban 2022 rundunar ‘yansandan ta samu labarin cewa an ga wasu ‘yan bindiga dauke da muggan makamai a unguwar Idasso da ke Kidandan a gundumar Galadimawa ta karamar hukumar Giwa.
- An Sace Makiyaya 20 A Cikin Mako Guda A Jihar Filato —MACBA
- Zagayen Maulidin Annabi (SAW) Ya Gudana Cikin Armashi A Bauchi
Ya ce ‘yan ta’addan sun kusa kai wa mutanen da ba su ji ba ba su gani ba gani ba a cikin al’umma, a lokacin da rundunar ‘yansandan ta kai daukin gaggawa a kusa da wajen da nufin dakile wannan mummunar manufa ta su.
Ya ce jami’an ‘yansandan sun yi artabu da ‘yan bindigar ne a wani kazamin fada tare da samun nasarar kashe ‘yan bindigar guda biyu yayin da wasu kuma suka tsere da raunuka daban-daban na harbin bindiga.
Ya ce jami’an sun kwato bindiga kirar AK49 dauke da harsashi guda ashirin da hudu (24) da kuma babur guda daya.
Ya ce an kubutar da wani da aka yi garkuwa da shi, mai suna Yusuf Dahiru mai shekara 65, ba tare da an ji masa rauni ba, ya kara da cewa a halin yanzu jami’an tsaro na sintiri a yankin domin kamo gungun barayin da suka gudu.
A cewarsa, kwamishinan ‘yansandan jihar ya gode wa jami’an bisa kokarin da suke yi, ya kuma dora musu alhakin hada kai da sauran jami’an tsaro domin kawar da miyagun abubuwa a jihar.
