Zargin Badakalar Kudade: NDP Ta Bukaci Sakataren PDP Ya Nemi Yafiyar Buratai

Jamiyyar NDP ta nemi Sakataren yada labarai na jamiyyar PDP na Kasa, Debo Ologunagba ya gaggauta neman yafiyar Mai Girma Jakadan Nijeriya a Jamhuriyar Benin, Laftanar Janar Tukur Buratai mai murabus.

Bukatar na kunshe ne cikin sanarwar da Sakatare Janar na Jam’iyyar NDP, Dakta Bolaji Abdulkadir ya rabawa manema labarai a garin Abuja.

• Badakalar Kudin Makamai: PDP Ta Bukaci Gwamnatin Tarayya Ta Binciki Buratai

Dakta Bolaji ya ci gaba da cewa, sanarwar da Debo Ologunagba ya fitar ta labaran kage a kan Buratai wani sabon yunkuri ne na son bata wa Buratai suna, na alakanta Buratai da mallakar wani gida a garin Abuja da hukumar yaki da almundahana da mallakar kadarori ba bisa ka’ida ba (ICPC) ta gano na naira biliyan 1.85.

A cewarsa, fayyace adadin kudaden da hukumar ta yi ya nuna cewa PDP na cikin rudani ne kawai na rashin me ke tafiya a kasar, inda ta Bazama wajen sanar da yan Nijeriya labaran karya.

Debo ya ce, PDP tun bayan rasa kimarta da ta yi a gun ‘yan Nijeriya yanzu ta na son ta tabbatar wa da ‘yan kasar nan har yanzu tana nan, amma ta hanyar yada labaran karya ga ‘yan Nijeriya.

A cewarsa, PDP har yanzu ta na a cikin jin tsoron tunkarar zabubbukan 2023 shi ya sa ta fito da sabon shirin yada labaran karya ga ‘yan Nijeriya.