Labarai

'Yan Bindiga Sun Tarwatsa Gadar Ngala A Borno

Wasu da ake zargin 'yan kungiyar Boko Haram ne sun tarwatsa wata babbar gada da ke Ngala a jihar Borno mai makwabtaka da kasar Kamaru.

Hakan ya haddasa katse daya daga cikin muhimman hanyoyin sufuri tsakanin Nijeriyar da kasar Kamaru abinda zai iya janyo tsaiko wajen kai wa mutane kayayyakin agaji.

Mazauna yankin sun ce akwai tarin kananan da manyan motoci dauke da kayan masarufi wadanda suka kasa tsallakawa ta gadar Ngala din.

Watakila An Harbo Jirgin Malaysia Bisa Kuskure, Cewar Jami’an Tsaro

Manyan jami'an leken asirin Amurka sun ce bayani da watakila za'a yi akan jirgin saman Malaysia da ya fadi a gabashin Ukraine shi ne 'yan aware da ke goyon Rasha sun harbo jirgin ne bisa kuskure.

Jamian leken asirin da aka sakaya sunayensu sun ce yayinda Rasha ke samarwa 'yan tawaye da makamai, amma Amurka ba ta da kwakwarar hujja akan makamin da aka yi amfani da shi wajen harbo jirgin saman,Rasha ce ta samar da shi.

Jihar Kano Zata Bi Sahun Manyan Biranen Duniya

Za'a kawata sufiri a birnin Kano

Jihar Kano zata bi sahun manyan biranen duniya wajen samar da sufiri na zamani. Don kuwa gwamnatin jihar ta sa hannu a wata takardar yarjejeniya ta samar da layin jirgin kasa  mai aiki da wutar lantarki da zai yi jigila a cikin birnin Kano.

Sojojin Nijeriya Sun Arce Saboda Boko Haram

Babban hafsan dakarun sojin kasan Nijeriya Laftanar Janar Keneth Minimah ya bayyana cewar wasu sojoji sun arce daga bakin aikin su saboda tsoron Boko Haram.

A cewar Minimah lamarin abin Allawadai ne kuma ya nuna cewar mutanen ba su dace da shiga aikin soja ba.

Ya kara da cewar sojan asali ba zai guje wa yaki ba, saboda an dauke shi aiki ne domin ya kare martabar kasarsa kuma ya je fagen daga.

Kungiyar Miyetti Allah Ta Koka Da Binciken Wasu Rugga A Jihar Kaduna

Shugaban kungiyar Miyetti Allah na jihar Kaduna Alhaji Ahmadu Suleiman ya koka akan binciken da wasu sojoji keyi a wasu rugga a kudancin jihar.

Alhaji Suleiman, yana amsa tambayoyin manema labaru a garin Kaduna ne  yayin da ya zargi sojoji da harbe masu shanu da sunan bincike.

Kwanaki 100 Da Sace 'Yan Matan Chibok

Kungiyar Bring Back our Girls da ke fafitukar kwato 'yan matan nan sama da 200 da 'yan kungiyar Boko Haram su ka sace a garin Chibok, za ta gudanar da zanga-zanga yau yayinda 'yan matan ke cika kwanaki 100 da sace su.

Kungiyar ta kuma ce sauran takwarorinta a kasashen duniya 35 za su gudanar da zanga-zanga makamancin haka.

Daya daga cikin 'ya'yan kungiyar Bring Back Our Girls, Otumba Dino Melaye ya shaidawa BBC cewa za su kuma yi magana da Sakataren Majalisar Dinkin Ban Ki Moon ta Skype.

WASANNI: Real Madrid Ta Dauko James Rodriguez

Kulob din Real Madrid ya dauko dan wasan da ya lashe kwallon zinari a gasar kofin duniya James Rodriguez, daga Monaco dake Faransa.

Dan wasan dan asalin Colombia mai shekaru 23, ya rattaba hannu a kwantiragin shekaru shida don buga wasa a Bernabeu.

Kudin da aka sayo dan kwallon kimanin fan miliyan 63, yasa ya zamo dan wasa na hudu mafi tsada da a ka sayo, bayan Gareth Bale da Cristiano Ronaldo da Luis Suarez.

Rodriguez, ya zura kwallaye shida a raga daga cikin wasanni biyar da ya buga a gasar kofin Duniya da hakan ya kai kasarsa wasan daf da na kusa da karshe.

Jonathan Ya Gana Da Iyayen ‘Yan Matan Chibok

Bayan kusan kwanaki 100 da sace 'yan mata dalibai a Chibok, shugaba  Goodluck Jonathan ya gana da iyayen 'yan matan da aka sace.

Dalibai 51 da suka kubuce daga hannun 'yan Boko Haram da kuma iyayen yara fiye da 100 ne suka halarci ganawar a fadar Shugaban Nijeriya da ke Abuja.

A makon da ya gabata ne iyayen yaran suka kauracewa ganawa da  Jonathan bisa wasu batutuwa na rashin fahimtar juna.

Gwamnatin Nijeriya Ta Haramta Yi Wa 'Yan Ci-Rani Rijista

Gwamnatin Nijeriya ta haramta tisa keyar mutane daga wasu jihohin kasar zuwa jihohinsu na asali kamar yadda yake faruwa yanzu haka a kudancin kasar.

Haka nan kuma an haramta wa wasu jihohin kasar yi wa 'yan ci-rani daga wasu sassan kasar rajista kafin su ci gaba da harkokinsu na yau da kullum.

Majalisar tsaron Nijeriya karkashin jagorancin Shugaba Goodluck Jonathan ce ta yanke wannan shawarar zaman da ta yi a Abuja.

Zaben 2015: Jonathan Ba Zai Samu Nasara Ba A Duk Jihohin Arewa — Kwankwaso

A yayin da fadar shugaban kasa ke shirin fitar da dantakar shugabancin kasar nan a jam’iyya mai mulki ta PDP, Gwamnan Jihar Kano Rabiu Musa Kwankwaso, ya zargi shugaba Jonathan da gaza samar ingantaccen tsaron kasa da kare dukiyoyin jama’a.

Kwankwaso ya kara da cewa, idan har hukumar zabe mai zaman kanta zata gudanar da sahihin zabe a shekarar 2015 abu ne mai wiya Jonathan ya yi nasara a zaben, kuma wannan mawiyacin halin da jama’a ke ciki ya  yi sanadiyyar ficewar jama’a da dama daga cikin kasar zuwa kasashe makwabta.

Pages

 
 

Monthly archive