Labarai

Sarkin Kano Ya Ziyarci Shugaba Jonathan

Bayan shafe lokaci suna zaman doya da manja, Shugaba Goodluck Jonathan da Sarkin Kano, Muhammad Sanusi II sun gana a fadar Aso Rock.

Hakan ya biyo bayan ziyarar da Sarkin Kano ya kai wa Jonathan a fadarsa da ke Abuja ne a yau  Alhamis.

A cikin watan Fabarairu, Jonathan ya kori Sarki Sanusi daga mukamin gwamnan babban bankin Nijeriya bayan ya yi zargin cewar an yi sama da fadi da fiye da dala biliyan 20 na harajin danyen mai.

2015: Shugaba Jonathan Ya Karbi Fom Din Takara

Shugaban Nijeriya, Goodluck Jonathan ya sayi fom din tsaya wa takarar sake shugaban kasa a karkashin jam'iyyar PDP.

Hakan ya sa yanzu ta tabbata cewa zai sake neman wani wa'adin mulki ba tare da hamayya a jam'iyyarsa ta PDP ba.

Dakta Abubakar Kari masanin kimiyyar siyasa a jami'ar Abuja, ya bayyana cewa dama dukkan alamu sun nuna Jonathan din zai fito takara.

Dakta Karin na ganin watakila tunanin kalubalantarsa karkashin tsarin mulki ne dama ya hana shi ambaton zai yi takarar.

Zamu Dauki Mataki A Kan Tambuwal, In Ji PDP

Jam'iyyar PDP mai mulki ta maida martani kan sauya-shekar da kakakin Majalisar Wakilai, Alhaji Aminu Waziri Tambuwal, ya yi daga PDP zuwa jam'iyyar adawa ta APC.

Shi dai kakakin Majalisar ya sanar da daukar wannan mataki ne a jiya Talata a zaman majalisar, inda daga bisani kuma ya dage zamanta zuwa ranar uku ga watan Disamba.

Mataimakin kakakin Jam'iyyar PDP, Barrister Ibrahim Jallo, ya bayyana cewa Jam'iyyar PDP ba ta gamsu da hanyar da Kakakin ya bi wajen sauya-shekar ba, don haka za ta dauki mataki a kansa.

Ba Zan Fice Daga APC Ba, Cewar Atiku

Tsohon mataimakin shugaban Kasar Nijeriya, Atiku Abubakar ya ce ba zai fice daga jam'iyyar APC ba duk yadda zaben fitar da gwani na shugaban kasa ya kasance.

Sanarwar da ofishin hudda da jama'a na Atiku suka fitar, ta ce ba zai sauya sheka zuwa jam'iyyar PDM ba ko da jam'iyyar APC ba ta tsayar da shi takara ba a zaben 2015.

Sanarwar ta ce rahoton wata jarida kan batun cewar Atiku zai iya barin APC ba gaskiya bane.

Shugaban Kasar Zambia Ya Mutu

Shugaban kasar Zambia, Michael Sata ya mutu a wani asibiti da ke birnin London yana da shekaru 77 a duniya.

Sakataren majalisar ministocin kasar, Dr Roland Msiska ne ya sanar da mutuwar shugaban kasar a yau Laraba.

Marigayin ya kwashe watanni yana fama da rashin lafiya, ko da yake ba a bayyana ciwon da ya yi ajalin nasa ba.

Mutuwar tasa ta zo ne 'yan kwanaki bayan kasar ta yi bukukuwan cikarta shekaru 50 da samun 'yancin kai.

'Yan Bindiga Sun Kashe Baturen Jamus A Ogun

'Yan bindiga a jihar Ogun sun kashe wani baturen Jamus sannan suka sace dayan baturen.

'Yan sanda a jihar ta Ogun sun tabbatar da lamarin wanda ya auku a garin Sagamu.

Kakakin 'yan sandan, Abimbola Oyeyemi ya shaidawa kamfanin dillancin labarai na AFP cewar "Mutane hudu dauke da makamai ne suka kaddamar da harin."

WASANNI: Van Gaal Ya Yabawa 'Yan Man U

Kocin Manchester United Louis van Gaal ya jinjinawa 'yan kwallonsa saboda jajircewar da suka yi a wasan su da suka yi da Chelsea ranar Lahadi.

A mintuna na 87 ne dai Van Persie ya farkewa kungiyar kwallon da dan wasan Daley Blind, lamarin da ya sa suka tashi 1-1.

Van Gaal ya ce,"Abin alfahari ne yadda suka taka leda duk da kalubalen da suka fuskanta."

Kocin Chelsea Jose Mourinho ya ce wasan bai yi musu dadi ba, yana mai cewa sun yi wasu kura kurai ne.

 

Fyade: An Daure Malamin Addini A Afghanistan

Wata kotu a kasar Afghanistan ta yanke wa wani Malamin addinin musulunci hukuncin daurin shekaru 20 a gidan yari bayan samunsa da laifin yi wa wata yarinya Dalibarsa ‘yar shekaru 11 fyade. Yarinyar ce ta shigar da kara a kotu duk da iyayenta sun la’anci bacin sunan da ta kawo wa gidansu. Kuma Kotun ta yanke hukuncin ne a ranar Asabar data gabata a birnin Kabul.

A watan Maris ne Malamin mai suna Muhammed Amunullah Barez da ke karantar da ‘ya'ya mata karatun Islama ya yi wa yarinyar fyade mai suna Hasina Sarwari.

Gwamnatin Nijeriya Ta Gaza Kan 'Yan Matan Chibok

Kungiyar kare hakkin bil Adama ta Human Rights Watch ta zargi hukumomi a Nijeriya da rashin gudanar da binciken da ya kamata a game da sace fiye da 'yan mata 200 na makarantar Chibok da kungiyar Boko Haram ta yi.

A cikin wani rahoto da ta fitar, kungiyar ta ce jami'an 'yan sanda a kasar sun nuna rashin damuwa sosai na tattara shaidu a game da sace 'yan matan, yayin da suke daukar lamarin wani karamin laifi.

Kungiyar ta ce 'yan Boko Haram suna tilastawa matan da suka yi garkuwa da su yin aure da sauya addini.

2015: Obasanjo Ya Gargadi PDP Da APC Kan Tsayar Da 'Yan Takara Masu Addini Daya

Tsohon shugaban kasa Janar Olusegun Obasanjo, ya gargadi manyan jam'iyyun kasar su yi la'akari da batun addinni wajen fitar da 'yan takararsu a zaben 2015.

A wata sanarwa, tsohon shugaban ya bukaci jam'iyyar PDP da kuma APC ka da su tsayar da mabiya addinni daya a matsayin dan takarar shugaban kasa da na mataimaki a zaben da ke tafe.

A cewarsa, lamarin zai kasance babu adalci, a tsayar da musulmi da musulmi ko Kirista da Kirista a matsayin 'yan takarar wata jam'iyyar a zaben 2015.

Pages

 
 

Monthly archive