2023: PDP Za Ta Fara Gudanar Da Yakin Neman Zabenta Ranar Litinin —Tambuwal

Jam’iyyar PDP ta ce ta kammala shirye-shiryen yakin neman zaben 2023.

Da yake jawabi ga manema labarai bayan kammala ziyara a ofishin yakin neman zaben Atiku Abubakar da aka bude a Abuja, babban daraktan kwamitin yakin neman zaben shugaban kasa na jam’iyyar PDP (PCC), Tambuwal, ya ce, za a kaddamar da gangamin ne a Uyo babban birnin jihar Akwa Ibom a ranar Litinin mai zuwa.

• PDP Ta Sake Kwace Kujerar Shugaban Karamar Hukuma Daga Hannun APC A Abuja

Gwamnan na jihar Sakkwato, ya ce jam’iyyar PDP ce kadai ta kaddamar da majalisar yakin neman zabenta, inda ya caccaki sauran jam’iyyun siyasar da cewa ba a sanya su acikin lissafin jam’iyyu masu shirin yakin neman zabe.

Ya kuma yi nuni da cewa, jam’iyyar PDP ita ce jam’iyyar da za ta iya doke kowace jam’iyya a fadin kasar nan, har ma a yankin Kudu maso Gabas, sabanin rade-radin cewa jam’iyyar PDP kimarta ta ragu.