Tsohon Gwamnan Jihar Adamawa Bindow Ya Fice Daga Jam’iyyar APC

Tsohon gwamnan jihar Adamawa, Sanata Muhammad Umar Jibrilla Bindow, ya fice daga jam’iyyar APC.

Bindow ya fice daga jam’iyyar ne a hukumance ta wata wasika da ya aike wa shugaban jam’iyyar APC na gundumar Kolere, karamar hukumar Mubi ta Arewa a jihar Adamawa, mai kwanan wata 20 ga watan Janairu, 2023, wacce LEADERSHIP ta samu kofi a ranar Talata.

• Lokaci Ya Yi Da Za A Bai Wa Mata Dama, Ina Goyon Bayan Takarar Binani A Adamawa —Buhari

Bindow, wanda bai bayyana jam’iyyar da zai koma ba, ya kara da cewa ‘magoya bayansa masu aminci’ a fadin jihar za su bi shi wajen ficewa daga jam’iyyar APC ta yadda za su jajirce wajen ganin an gina jihar Adamawa.

A cewar tsohon gwamnan, wanda ke rike da sarautar gargajiya ta ‘Sardaunan Mubi’, ya yanke shawarar ficewa daga jam’iyyar APC ne sakamakon rashin samun sahihin sulhu na masu ruwa da tsaki a jam’iyyar a jihar Adamawa, tun bayan shan kaye da jam’iyyar ta sha a 2019 a babban zabe da kuma sakamakon zaben fidda gwani na jam’iyyar APC na 2022.