Jam’iyyar APC a jihar Jigawa ta fitar da sabbin ‘yan takarar sanata yayin da dukkanin Sanatoci Uku da ke karkashin jam’iyyar suka fadi warwas a zaben fidda gwani na zaben 2023.
Sanata mai wakiltar Jigawa ta tsakiya, Sabo Muhammad Nakudu bai samu tikitin tsayawa takarar Sanatan APC ba bayan ya koma kujerar gwamna wanda shi ma ya sha kaye. Hon Tijjani Ibrahim Gaya shine ya maye gurbin sanatan.
Hakazalika, Sanata mai wakiltar Jigawa ta Arewa maso Gabas, Sanata Ibrahim Hassan Hadejia ya nemi tikitin takarar gwamna amma ya sha kaye. Ambasada Abdulhamid Malam madori shine ya maye gurbin Sanatan.
Sanata mai wakiltar Jigawa ta Arewa maso Yamma Sanata Dalladi Abdullahi Sankara ya janye daga takarar ne kasa da sa’o’i 10 a fara zaben fidda gwanin jam’iyyar, bisa zargin nuna son kai da shugabannin jam’iyyar suka yi masa.
Sakataren dindindin na ma’aikatar ayyuka ta tarayya, Alhaji Babangida Hussaini mai ritaya, shi ya lashe tikitin tsayawa takarar Sanatan Jigawa ta Arewa maso yamma na jam’iyyar APC, inda ya samu kuri’u 523.
LEADERSHIP ta yi hasashen cewa kashi biyu cikin uku na ‘yan majalisar dokokin kasar da ke ci yanzu ba za su koma ba.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
