A yau Talata 5 ga wata ne, memban ofishin siyasa na kwamitin kolin jam’iyyar kwaminis ta kasar Sin, kana ministan harkokin wajen kasar, Wang Yi, ya halarci bikin kaddamar da taron karawa juna sani na kasa da kasa a birnin Beijing, don tunawa da cika shekaru 75, da wallafa “sanarwa kan hakkin dan Adam na duniya”, tare da gabatar da jawabi.
Jami’in ya ce, sanarwar na da babbar ma’ana a tarihin ci gaban wayewar kan bil’adama, wadda ta taka muhimmiyar rawa ga bunkasar harkokin kiyaye hakkokin dan Adam a duniya.
- Jami’in Diflomasiyyar Falasdinu: PA Ta Godewa Kasar Sin Bisa Aikewa Da Agaji Ga ’Yan Gaza Cikin Sa’o’in Bukata
- Ding Xuexiang Ya Halarci Taron Koli Kan Sauyin Yanayi Tsakanin Shugabannin Kasashen G77 Da Kasar Sin
Wang ya ce jam’iyyar kwaminis, gami da gwamnatin kasar Sin, sun dade suna mayar da hankali sosai kan ayyukan rayawa, gami da kiyaye hakkokin dan Adam, bisa la’akari da hakikanin halin da kasar take ciki. Kaza lika turbar da kasar Sin ta zaba don raya hakkin dan Adam, ta dace da halin da take ciki, gami da muradun al’ummarta, kuma Sin za ta ci gaba da kokari a wannan fanni ba tare da kasala ba.
Jami’in ya kuma jaddada cewa, kasarsa za ta nuna hazaka wajen halartar ayyukan daidaita harkokin duniya, da aiwatar da sanarwa kan hakkin dan Adam na duniya, da ci gaba da tallata akidun daukacin bil’adama, ciki har da zaman lafiya, da bunkasuwa, da daidaito, da adalci, da demokuradiyya, da ‘yanci, ta yadda sana’ar kare hakkin dan Adam ta duniya za ta kara bunkasa. (Murtala Zhang)
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
