Ba Sai Mace Ta Tallata Jikinta Za Ta Samu Kudi Ba – Amina Ishak

Amina Ishak Bako, matashiya ce kuma ‘yar kasuwa mai neman abin da za ta rufa wa kanta da iyaye ‘yan uwa da abokan arziki asiri, a cikin hirarsu da wakiliyar LEADERSHIP Hausa Maryam Aliyu Dankyalta bayan yadda ta tsunduma harkar kasuwanci da nasarorin da samu har ma da kalubalen da ke fuskanta, inda cikin kalamanta na jan hankali ta ce ba sai mace ta tallata jikinta za ta samu kudi ba. ga dai yadda hirar ta kasance:

Da fari za mu so sanin cikakken sunanki da tarihinki?

Suna na Amina Ishak Bako ni cikakakkiyar ‘yar Filato ce daga daga Karamar Hukumar Mangu, kuma ina zaune a cikin Garin Jos.

Shin Amina matar aure ce?

A’a ni ba matar aure ba ce

To ‘yar kasuwa ce ko kuma ma’aikaciya ce?

Ni ‘yar kasuwa ce

Wanne irin kasuwanci kike yi? 

Gaskia Ina kasuwanci da dama amma abin da na fi ba da karfi shi ne saida dankalin turawa, kayan lambu, Kamfala da takalman maza da hulunan maza.

Me yaja hankalinki har kika shiga wannan kasuwancin?

Zaman banza ne ba na so, kuma saboda ina ganin idan ina sana’a zan fi karfin kudi sabulu da turare da sauran hidindimu ga kuma uwa uba zan iya taimaka wa mahaifiyana da hidimomin gida.

Nenene matakin karatunki?

Matakin karatu na Digiri.

Wanne irin kalubale kika taba fuskanta a cikin sana’arki? 

Mutane da dama musaman wadanda suka sanni sai zu karbi kayana bashi ba za su biya ba har ya kai ga na samu karayar jari

Zuwa yanzu wadanne irin nasarori kika cimma?

Eh to yanzu gaskiya zan ce na yi nasara wajen taimaka wa mahaifiyata da wasu abubuwan.

Wanne abu ne yafi faranta miki rai game da sana’arki?

Gaskiya Alhamdullilah tun da a yanzu bani tambaya ko rokon wani taimako gun kowa kama daga kan ‘yan uwa zuwa ga saurayi saboda abin da ke kawo kaskanci kenan.

Ta wacce hanya kike bi wajen tallata sana’arki?

Ta intanet da dama kuma ‘yan uwa na taya ni tallata kayana zuwa ga abokan aikinsu da abokansu kuma suma masu sayen kayana Alhamdullilah suna gaya wa wasu akaina.

Dame kike so mutane su rika tunawa dake?

Ina so a tuna da ni ta fuskar abubuwa da dama, amma mafi muhimmanci shi ne mace ba lalle sai ta tallata jikinta kafin ta sami abin da take so ba, tare da aiki tukuru da juriya babu abin da ya gagara

Wanne irin goyon baya kike samu daga wajen iyaye da ‘yan uwanki?

Gaskia Alhamdullilah saboda ina samu goyon baya yadda ya kamata saboda suna nufina da abubuwa da dama

Kawaye fa?

Ina da kawaye amma yawanci wadanda muka hadu a makaranta ne muka zama abokai

Me kike fiso cikin kayan sawa da kayan kwalliya?

Ni ba ma’abociyar kwalliya bace amma ina son Abaya sosai da turare

A karshe wace irin shawara za ki ba ‘yan uwanki mata?

Mata mu tashi mu kama sana’a tana hana sa ido

Na gode