Mai Sana’ar POS A Kano Ya Samu Kyautar Naira 500,000 Sakamakon Mayar Da Naira Miliyan 10 Da Aka Tura Bisa Kuskure 

Wani mai sana’ar POS mai shekaru 37 mai suna Mohammed Sani Abdulrahman da yake da zama a Kurnar Asabe Quarters a cikin birnin Kano, ya samu kyautar kudi har Naira N500,000.00 daga hannun wani dan kasuwa, wanda ya yi kuskure ya tura masa Naira Miliyan N10,000,000.00 a maimakon Naira Dubu N10,000.00.

An kai rahoton faruwar lamarin ga ‘yansanda a watan Disamba, 2023 yayin da jami’an rundunar ‘yansandan jihar Kano suka dauki watanni uku kafin su kammala bincike tare da warware lamarin a ranar Laraba, 13 ga watan Maris.

• Ba Za A Iya Dakatar Da Dunkulewar Kasar Sin Ba
• Bude Iyakokin Nijeriya Da Nijar: NIS Ta Dage Takunkumin Shige Da Fice

Wata sanarwa da jami’in hulda da jama’a na rundunar ‘yansandan (PPRO), SP Abdullahi Haruna Kiyawa, ya wallafa a shafinsa na Facebook a safiyar ranar Alhamis, ya ce, Mohammed ya kai kansa hedikwatar ‘yansandan jihar ne da ke Bompai, Kano, a watan Disambar 2023 kuma ya bayyana cewa, wani abokin cinikinsa da bai san ko wane ne ba, ya aika da kudi Naira Miliyan N9,990,000:00 zuwa asusun kasuwancinsa maimakon Naira Dubu N10,000:00.

Kwamishinan ‘yansandan jihar Kano, CP Muhammad Usaini Gumel ya yabawa Sani mai POS bisa gaskiya da amana da ya nuna a harkar kasuwancinsa.