Edo: Shaibu Ya Sauya Sheka Zuwa APC

Mataimakin gwamnan Jihar Edo, da kotu ta mayar kan mukaminsa, Philip Shaibu, ya koma jam’iyyar APC daga jam’iyyar PDP. 

Wannan koma jam’iyyar ne, tare da wasu manyan mambobin kungiyar Legacy ta Dan Orbih daga PDP.

• Sirrin Turare Da Sabulun Almiski (1)
• Za Mu Dawo Da Martabar Gidajen Sinima A Arewa  – Ali Nuhu

Shaibu ya bayyana aniyarsa ta kawo ci gaba ga APC, inda ya ce sun dawo ne don kara wa jam’iyyar kima.

Shaibu ya jaddada kudirinsa na kwace Jihar Edo da kuma goyon bayan dan takarar gwamnan APC, Monday Okpebholo, da mataimakinsa, Dennis Idahosa.

Ya ce komarsu jami’yyar za ta yi tasiri, tare da kawo ci gaba da sabuwar jam’iyyar tasu.

Shaibu ya jaddada aniyarsu na yin aikitare da sauran ‘yan jami’yyar APC a jihar fuskantar duk wani kalubale da zai iya tasowa.

Shaibu ya isa wajen da aka karbe shi da karfe 2:08 na rana kuma kai tsaye ya tafi waje tsohon gwamnan Jihar Edo, Sanata Adams Oshiomhole, don yin mubaya’a a gare shi.

Wannan alamar ta jaddada biyayyar Shaibu ga jagorancin jam’iyyar da kuma aniyarsa ta cika muradun APC.