Gabanin tafiyar shugaban kasar Sin Xi Jinping kasar Rasha don halartar ganawa ta 16 ta shugabannin kasashe membobin BRICS, a ranar 18 ga wannan wata, an kaddamar da bikin watsa jerin shirye-shiryen babban gidan rediyo da telabijin na kasar Sin wato CMG a kasar Rasha, wanda CMG da jaridar Rasha wato jaridar gwamnatin kasar Rasha da babban gidan telabijin na Asiya na kasar Rasha da sauran manyan kafofin watsa labaru na kasar Rasha suka yi hadin gwiwa wajen gudanarwa, inda za a watsa shirye-shiryen CMG guda 11 ciki har da shirin gamuwa da shugaba Xi Jinping da sauransu a manyan kafofin watsa labaru na kasar Rasha.
A cikin jawabinsa ta kafar bidiyo, shugaban CMG Shen Haixiong ya bayyana cewa, bana ce ta cika shekaru 75 da kafuwar jamhuriyar jama’ar kasar Sin, ta kuma cika shekaru 75 da kulla dangantakar diplomasiyya a tsakanin Sin da Rasha, kuma shekara ta farko da kaddamar da bikin musayar al’adu a tsakanin Sin da Rasha. Bisa jagorancin shugabannin kasashen biyu, Sin da Rasha sun zama misali kan raya sabuwar huldar dake tsakanin manyan kasashe. Kana kafofin watsa labaru na kasashen biyu sun yi hadin gwiwa sosai. Bikin watsa shirye-shiryen CMG a kasar Rasha zai kara sa kaimi ga aiwatar da ayyukan da shugabannin kasashen biyu suka cimma daidaito a kai da sada zumunta a tsakaninsu baki daya. (Zainab Zhang)
