Assalamu alaikum masu karatu, barkanmu da sake haduwa da ku a wannan makon a cikin shirin namu mai farin jini da albarka na Adon Da Kwalliya.
To ga abin da uwargida za ta tanada
Za ki tanadi Kubewa, Albasa, Farar Shinkafa, Kwai:
Da farko uwargida za ki samu kubewarki mai kyau ki wanke ta ki ajiye a gefe, sannan farar shinkafa ita ma ki gyara ta ki wanke ta idan da tsakuwa ki rege ta ki bar ta da dan ruwa saboda ta jiku sai ki gyara albasa ki dan yanka ta kamar gida hudu haka sai ki hade su waje daya, amma shinkafar ki zuba mata da ruwan da kika bar ta da shi dama saboda ta jiko ne sannan ki nika su su yi laushi sosai sai ki zuba a wata roba haka sai ki fasa kwai ki zuba a ciki, sannan ki gauraya shi sosai ya hade jikinsa za ki ga ya yi kauri sosai to shi za ki yi amfani da shi ki shafa a kanki, za ki barshi kamar na tsawon awa daya zuwa biyu haka sai ki wanke.
Uwargida za ki ga abin mamaki kan ki zaiyi tsayi ya yi laushi ya yi baki kin huta da shafa man shamfo, ana yin sa duk bayan wata daya.
