Yayin da lokacin sanyi da kurar Hunturu ke kankama a sassa daban-daban na arewacin Nijeriya, ana shawarci mazauna kasarnan da su dauki matakan kariya daga busasshiyar iska, kura, sanyin safiya da kuma karancin gani a kan hanya.
Wannan yanayi na iya shafar fata, idanu, numfashi da lafiyar jiki baki daya. Haka kuma, kurar da ke mamaye hanyoyi na iya kara hadarin afkuwar hadurran ababen hawa.
- Sojoji Sun Ceto Mutane 3 Da Aka Yi Garkuwa Da Su A Kebbi
- Kasar Sin Na Maraba Da Karin Kasashe Su Shiga Kungiyar Hadin Gwiwar Fasahar AI Ta Duniya
- Sin A Shirye Take Ta Samar Da Cimma Matsaya Kan Tsarin Mabambantan Bangarori Tare Da Karfafa Rawar Da MDD Ke Takawa
- Majalisar Dokokin Kano Ta Tabbatar Da Mutane 6 A Matsayin Sabbin Kwamishinoni
- Dawowar Taiwan Babban Yankin Sin: Kasashe Masu Tasowa Ba Za Su Bari Hannun Agogo Ya Koma Baya Ba
Ga wasu hanyoyi masu amfani da za ku bi domin kare kanku da iyalinku a wannan lokaci.
1. Kare kai daga sanyi da kura: Sanya tufafi masu dumi, musamman da sassafe da kuma da dare. Yin amfani da takunkumin rufe hanci da baki a wuraren da kura ta yi yawa, musamman idan kana fama da rashin lafiyar da kura ke haddasawa ko matsalar numfashi. Sanya tabarau na kariya domin rage shigar kura cikin idanu. Guji fita waje ba tare da buƙata ba a lokutan da kura ta yi yawa a sararin samaniya.
2. Kare fata daga bushewa da tsagewar lebba- Shafa man laushin fata (moisturising cream) bayan yin wanka domin kiyaye laushin fata da hana ta bushewa. Yin amfani da man lebba (lip balm) ko man Baseline (petroleum jelly) domin kare lebba daga bushewa da tsagewa. Yin wanka na dan lokaci kadan, tare da amfani da ruwan dumi maimakon ruwan zafi sosai. Guji amfani da sabulun da ke sa fata ta kara bushewa.
3. Shan isasshen ruwa:- Rika shan ruwa a kai a kai cikin yini, ko da ba ka jin kishirwa. Riƙa cin ’ya’yan itatuwa da kayan lambu a matsayin wani ɓangare na abin ci mai gina jiki. Ka da ka dogara da abubuwan sha masu yawan sukari a matsayin babbar hanyar samar wa jikinka ruwa. Busasshiyar iska na iya ƙara saurin da fata da lebba ke rasa danshi, ko da yanayin ba ya jin zafi.
4. Kare hanci, ido da huhu:- Riƙa wanke hannuwanka akai-akai da sabulu da ruwa mai tsafta. Rika tsaftace gidanki da tsumma mai dan danshi domin hana kura da iska yaduwa a cikin gida. Rufe tagogi da kofofi idan ƙura ta yi yawa, idan hakan zai yiwu. Masu fama da cutar asma su bi umarnin amfani da magungunan da likita ya rubuta musu, tare da guje wa wuraren da kura ta yi yawa. Nemi kulawar likita idan ka fuskanci tari mai ɗaukar lokaci, fitar da sautin huci yayin numfashi ko wahalar numfashi.
5. Ɗaukar ƙarin matakan kariya yayin tuƙi:- Rage gudu da abin hawa idan gani ya yi rauni saboda kura ko hazo. Yin amfani da fitilun abin hawa da suka dace, tare da barin tazara mai yawa tsakanin motarka da sauran ababen hawa. Guji wucewa gaban wata mota idan ba ka iya ganin hanya da kyau. Idan ganin hanya ya yi rauni sosai har ya zama haɗari, tsaya a wuri mai aminci, nesa da zirga-zirgar ababen hawa, sannan ka jira yanayin ya inganta. Ƙurar lokacin hunturu na iya rage ganin hanya sosai, lamarin da ke kara hadarin hadurran ababen hawa.
6. Kare yara da tsofaffi: Yara da tsofaffi na buƙatar ƙarin kulawa da kariya daga sanyi da ƙura. A tabbatar suna sanya tufafin da suka dace da yanayin, suna shan ruwa akai-akai, tare da guje wa zama na dogon lokaci a wuraren da ƙura ta yi yawa.
7. Kare Gida Daga Gobara: Yanayin bushewar da ake samu a lokacin hunturu na iya sa gobara yaɗuwa cikin sauri. Kashe na’urorin lantarki idan ba a amfani da su. Ajiye ashana da sauran abubuwan da za su iya kunna wuta a wuraren da yara ba za su iya kaiwa ba. Yin taka-tsantsan wajen amfani da wuta a lokacin girki, kuma guji kona shara a kusa da gidaje. Ajiye abubuwan da za su iya kama da wuta cikin sauƙi nesa da wuraren da ake samun zafi ko wuta.
8. Sanin lokacin neman taimakon Likita: Ka da a yi watsi da matsananciyar wahalar numfashi, ciwon ƙirji, suma ko wasu manyan alamomin rashin lafiya. A nemi kulawar likita cikin gaggawa idan wadannan alamomi suka bayyana. Mutanen da ke fama da wasu cututtuka tun da farko ya kamata su bi shawarwarin ƙwararrun ma’aikatan lafiya domin kiyaye lafiyarsu a lokacin hunturu.
