Assalamu alaikum masu karatu, barkanmu da sake haduwa daku a wannan makon a cikin shirin na mu mai farin jini da albarka na Girki Adon Mata.
A yau shafin na mu zai kawo mana yadda ake Towon Alkama da Miyar Taushe:
Tuwon Alkama da Miyar Taushe na daga cikin abincin gargajiya da ake matukar so a Arewacin Najeriya. Wannan hadin abin ci yana da dadi.
Abubuwan da ake bukata:
Garin alkama, Ruwa,
Dan gishiri
Yadda Ake hadawa:
Da farko, a tafasa ruwa a tukunya. Sai a rage tafasasshen ruwan a wani abu a rufe a ajiye shi a gefe, sannan a dibi garin kadan a zuba a wani roba a dama da ruwan sanyi, sai a zuba a cikin tukunyar ruwan ana motsawa da zuciya ana zuba shi kadan kadan haka har a gama ana motsawa saboda karya kololo, sai a rufe tukunyar amma kar a rufe ta gaba daya, saboda karya taso ya zuba. Sai a barshi na ‘yan mintuna.
Daganan a kashe wuta a sake tuka shi da sauran garin sosai har sai tuwon ya yi laushi kuma ya yi kyau. A rage wuta, a barshi na dan lokaci kafin a kwashe shi.
Kayan Hadin Miyar Taushe:
Nama, Kabewa, Albasa, Tumatir, Tattasai, Daddawa Man ja
Gishiri, Kayan kamshi
Yadda Ake hadawa:
A wanke nama, a saka shi a tukunya tare da albasa, gishiri da kayan kamshi, sannan a dafa har sai ya dahu.
A tafasa kabewa daban, sannan a markada a dama ta sosai.
A dora tukunya a wuta, a zuba man ja a soya albasa. A kara tumatir, tattasai da aka nika, a soya su sosai.
Sai a hada kabewa da ruwan naman da aka dafa, a kara daddawa da sauran kayan kamshi. A bar miyar ta tafasa sosai, daga nan a zuba naman.
A bar ta ta dahu har sai kayan hadin sun gauraya kuma miyar ta yi kyau, sannan a sauke. Za a iya zuba ganye kamar alayyahu ko zogale ko yakuwa domin kara wa miyar armashi da dandano.
