Amurka Ta Kashe Shugaban Al-Qaeda A Wani Hari Da Ta Kai Afghanistan

Shugaban kasar Amurka Joe Biden, ya sanar cewa ya bayar da umarnin kashe shugaban kungiyar al Qaeda Ayman Zawahiri a wani harin da aka kai da jirgi mara matuki a Kabul, babban birnin Afghanistan a ranar Asabar.

Biden ya ce Ayman Zawahiri ne babban mataimakin Osama bin Laden kuma yana da hannu a harin 11 ga watan Satumbar 2001, wanda ya yi sanadin mutuwar mutum fiye da dubu uku a Amurka.

• Gwamnatin Yobe Ta Yi Wa Takin Zamani Farashi A Kan N13,000
• Ni Da APC Mutu-Ka-Raba – El-Rufai

Shugaban na Amurka ya bayyana kashe al Zawahiri a matsayin abin da zai kwantar da hankulan iyalan wadanda suka halaka a hare-haren da al Qaeda ta kai.

Biden ya kuma ce Amurka za ta tabbatar ba a sake mayar da Afghanistan wata matattarar ‘yan ta’adda ba.

Sa’o’i kadan gabanin sanarwar ta Sldhugaba Biden, kakakin Taliban Zabihullah Mujahid, ya ce lallai Amurka ta kai wani hari da jirgi mara matuki a birnin Kabul, kuma ya yi tur da kai harin, sai dai bai ambaci sunan al Zawahiri ba.

Ya kuma ce harin ya sabz wa tsarin kasa da kasa da ya hana wata kasa kai hari cikin wata kasar mai ‘yancin kai ba tare da amincewarta ba.

Sakataren harkokin waje na Amurka, Anthony Blinken, ya ce kungiyar Taliban ta saba wa yarjejeniyar da ta kulla da Amurka a birnin Doha, wanda a karkashinta Amurka ta janye dakarunta daga Afghanistan a bara.

a karkashin yarjejeniyar, Taliban ta amince ba za ta kyale kungiyoyin ‘yan ta’adda su yi amfani da kasar a matsayin wurin kitsa hare-hare kan kasashen yammacin duniya ba.