An Karrama Shugaban Qausain TV, Kanar Sani Bello Da Lambar Yabo

Mai Girma Shugaban Gidan Talabijin na Qausain TV, da kuma Kamfanin Makamashi na Mainstream Energy Solutions Limited (MESL) Kanar Dr. Sani Bello (Mai ritaya) ya samu lambar yabo ta Nasarar Rayuwa a fannonin Kasuwanci, Jagoranci da Karamci daga Cibiyar Hadin Gwiwa ta Nigerian -American Chamber of Commerce (NACC).

An karrama Kanar Bello ne a yayin bikin cikar Cibiyar shekaru 65 jiya a Legas, inda cibiyar ta aminta da gagarumin jagorancinsa ga kwararrun ‘yan kasuwa da kuma fitattun gudummawar da ya taimaka wa harkokin kasuwanci, da kafofin yada labarai, da makamashi na Najeriya.

• Salah Ya Kafa Tarihi Yayin Da Liverpool Ke Dab Da Lashe Gasar Firimiya
• CMG Ya Kaddamar Da Nuna Fina-Finai Da Shirye-Shiryen Talabijin Na Kasar Sin Masu Inganci A Malaysia

Hakazalika a karkashin jagorancinsa, Kamfanin Makamashi na MESL ya samu nasarar sarrafa manyan tashoshin samar da wutar lantarki kamar Kainji, Jebba, Zungeru, da Kashimbila, yayin da Gidan Talabijin na Qausain yake cigaba da bunkasa a matsayin babbar murya a bangaren yada shirye-shirye.

Bikin ya kuma gabatar da nadin Alhaji Sheriff Balogun a matsayin shugaban majalisar na kasa karo na 20, karkashin taken: “Alfanun Hadin Gwiwa: Shekaru 65 Na Inganta Dangantakar Tattalin Arzikin Najeriya da Amurka.”

Hukumar ta NACC ta ci gaba da jajircewa wajen inganta dangantakar tattalin arziki da kasuwanci tsakanin Najeriya da Amurka.