Bayan Kashe Ma’aikacin CBN Da Matarsa, An Yi Garkuwa Da Dansa A Ogun

A makon da ya gabata ne wasu masu garkuwa suka kashe wani ma’aikacin Babban bankin Nijeriya, mai suna Kehinde Fatinoye.

Masu garkuwar sun kashe Fatinoye tare da matarsa, kafin wannan lokacin dai shi ne, sakatare a jami’ar noma ta gwamnatin tarayya da ke Abeokuta.

• ‘Yansanda Sun Kashe ‘Yan Bindiga 3, Sun Kwato AK-47 2 A Bauchi

Majiyarmum ta shaida mana cewa, wasu mutane ne suka shiga unguwar Ibara GRA, daidai lokacin da suke dawo wa daga New Year.

Majiyar ta ce, an kashe mata da mijin, aka kuma kone gawar tasa a cikin gidansu.
Haka kuma, an kama dansa da wani malami daya, an tafi da su.

Mai Magana da yawun rundunar ‘yansanda na jihar Ogun, Abimbola Oyeyemi, ya tabbatar da faruwar wannan lamarin, wanda ya ce: “Gaskiya ne, wannan lamarin ya faru. Tuni ma har an fara bincike. An ma kama wani mutum da ake zargin yana da alaka da wannan lamarin. An kashe mutumin da shi da matarsa kuma har yanzu ba a ga dansa ba, wanda shi ma aka dauke shi.”

Ya kuma tabbatar da cewa: “Abin ya faru ne da misalin karfe 12 na dare. Za mu ci gaba bincike har sai mun samu nasarar kama dukkan wanda ke da hannu cikin wannan lamari na kisa.”