Farashin man fetur ya sake tashi a Abuja, bayan wasu gidajen mai da ke Babban Birnin Tarayya sun ƙara kuɗin da suke sayar da litar man fetur, sakamakon ƙarin farashin man da ake sayarwa daga matatar Dangote.
Matatar Dangote ta ƙara farashin PMS daga N1,265 zuwa N1,350 kan lita, wanda ya haifar da sabon ƙarin farashin a gidajen mai daban-daban. A binciken da Leadership ta gudanar, MRS na sayar da lita kan N1,395, Mobil N1,400, yayin da NIPCO ta kai N1,430 kan lita.
Wani ma’aikacin MRS ya ce har yanzu suna sayar da tsohon kaya, kuma ana iya samun ƙarin farashi bayan sabon kaya ya iso. Ƙarin farashin matatar Dangote ya wakilci kusan kashi 6.7 cikin 100.
Masana sun ce tashin farashin ɗanyen mai a kasuwannin duniya da ƙarin kuɗin sufuri na daga cikin abubuwan da ke matsa farashin man fetur sama. Brent crude ya kasance sama da dala 108 kan ganga, lamarin da ka iya ƙara tsadar jigilar man zuwa birane da ke nesa da wuraren samar da shi.
Masanin tattalin arziƙi Aliyu Ilias ya yi gargaɗin cewa ƙarin farashin man fetur zai ƙara matsin lamba ga iyalai da ‘yan kasuwa, musamman ta hanyar ƙara kuɗin sufuri, samar da kayayyaki da farashin abinci. Ya yi kira ga hukumomi su ɗauki matakan rage tasirin ƙarin kuɗin kan al’umma.
