Yawaitar gobara a kasuwannin Jihar Kano na ci gaba da jefa ’yan kasuwa cikin asarar dukiya, tare da tayar da tambayoyi kan matakan kariya, saurin kai agaji, inshorar kaya da kuma tallafin da gwamnati ke bai wa waɗanda suka yi asara.
A shekarar 2026, gobara ta tashi a wasu manyan kasuwanni, ciki har da Singer, Fatima Simra da ke Dakata, da Kofar Wambai. Wannan ya sake tayar da tambayar ko kasuwannin na da isassun kayan kashe gobara da hanyoyin gaggawa.
Gobarar kasuwanni da ƙalubalen kai agaji
A ranar 14 ga Fabrairu, 2026, gobara ta tashi a yankin Gidan Gilas, wanda aka fi sani da Gidan Mai, a Kasuwar Singer. Rahotonni sun ce gobarar ta shafe kusan sa’o’i 24, tare da lalata kayayyakin ’yan kasuwa na biliyoyin naira. Cunkoson ababen hawa da ƙarancin hanyoyin shiga kasuwar sun kuma kawo cikas ga aikin jami’an kashe gobara.
A ranar 20 ga Fabrairu, wata gobara ta lalata shaguna kusan 50 a Kasuwar Fatima Simra da ke Dakata, wadda ke ɗauke da ƙananan masana’antun sarrafa mai, robobi da ledoji. Haka kuma, a ranar 5 ga Satumba, gobara ta shafi shaguna da gidaje shida a Kasuwar Kofar Wambai, kamar yadda kafafen yada labarai suka ruwaito.
Waɗannan Gobara da ta tashi a kasuwanni sun nuna bukatar samar da ingantaccen tsarin rigakafi da tunkarar ibtila’i a kasuwannin jihar.
Shin kasuwanni na da isassun kayan kariya?
A wani taron masu ruwa da tsaki da Ƙungiyar ’Yan Kasuwa da Masana’antu ta Kano (KACCIMA) ta shirya a ranar 22 ga Fabrairu, 2026, an bayyana matsalolin da suka haɗa da ƙarancin na’urorin kashe gobara, rashin isasshen ruwan kashe gobara da kuma matsalar hanyoyin shiga kasuwanni.
Shugaban KACCIMA, Ambasada Usman Darma, ya ce binciken da aka gudanar ya nuna cewa a wasu lokuta jami’an kashe gobara na tafiyar kilomita 10 zuwa 15 kafin samun ruwan da za su yi amfani da shi.
Taron ya kuma ba da shawarar samar da jami’an sa ido kan gobara, na’urorin gano hayaƙi da ƙararrawa a shaguna, tare da kula da na’urorin hasken rana domin rage haɗarin matsalolin lantarki.
Haka kuma, cunkoson shaguna da ajiye kaya a hanyoyin da ke tsakaninsu na iya hana motocin kashe gobara isa inda gobara ta tashi. Don haka, akwai bukatar buɗe hanyoyin gaggawa da samar da wuraren samun ruwa a cikin kasuwanni.
Tallafin gwamnati: Nawa aka raba?
Bayan gobarar Kasuwar Singer, Gwamnatin Jihar Kano ta sanar da tallafin Naira miliyan 100 ga waɗanda abin ya shafa.
Haka kuma, Mataimakin Shugaban Ƙasa, Kashim Shettima, ya sanar a ranar 16 ga Fabrairu cewa Gwamnatin Tarayya ta amince da Naira biliyan biyar, yayin da Gwamnonin APC suka yi alƙawarin bayar da Naira biliyan uku. Jimillar tallafin da aka sanar ta kai Naira biliyan takwas.
Sai dai har yanzu akwai bukatar fayyace adadin kuɗaɗen da aka raba, waɗanda suka amfana da yadda aka tantance su. Sanar da tallafi ba yana nufin an biya duk waɗanda suka cancanta ba.
Haka kuma, ya kamata a bambanta tallafin gwamnati da na jama’a, domin tallafin ba lallai ya maye gurbin cikakken jarin da ’yan kasuwa suka rasa ba.
Matakan da ake bukata
Domin rage yawaitar gobara da kare jarin ’yan kasuwa, ya kamata gwamnati da shugabannin kasuwanni su:
- Gudanar da binciken tsaron lantarki a shaguna tare da gyara hanyoyin haɗa wutar lantarki marasa inganci.
- Samar da na’urorin kashe gobara, gano hayaƙi, ƙararrawa da wuraren samun ruwa.
- Buɗe hanyoyin gaggawa domin motocin kashe gobara su iya isa wuraren ibtila’i.
- Kafa jami’an sa ido kan tsaron gobara a kasuwanni.
- Bayyana yadda ake raba tallafin gwamnati da adadin waɗanda suka amfana.
Shin za a iya kare jarin ’yan kasuwa?
Matsalar gobara a kasuwannin Kano ba ta tsaya ga asarar kayayyaki ba; tana shafar tattalin arzikin jihar da rayuwar dubban iyalai da suka dogara da kasuwanci.
Saboda haka, tallafa wa waɗanda suka yi asara bayan gobara ba zai wadatar ba idan ba a ɗauki matakan hana sake faruwar lamarin a gaba ba.
Babban ƙalubalen da ke gaban gwamnati da shugabannin kasuwanni shi ne samar da ingantaccen tsarin kariya, gaggauta kai agaji da kuma tabbatar da cewa ’yan kasuwar da suka yi asara suna da damar farfaɗowa.
Tambayar ita ce: Shin za a samar da tsarin da zai kare jarin ’yan kasuwar Kano tun kafin gobara ta tashi, maimakon jiran a tattara asarar da aka yi?
