Gwamnatin Yobe Ta Yi Wa Takin Zamani Farashi A Kan N13,000

Gwamnan Jihar Yobe, Mai Mala Buni ya tsayar da farashin takin zamani, samfurin NPK kan Naira 13,000 domin noman bana.

A jawabin da ya yi yayin kaddamar da shirin takin, Buni ya yi gargadi cewa iya manoma kawai za a sayar wa da takin.

• Ni Da APC Mutu-Ka-Raba – El-Rufai
• Kwamishinan Tambuwal Ya Sauya Sheka Daga PDP Zuwa APC

“Ina mai gargadar ku cewa gwamnati ba za ta lamunci yin sama-da-fadi ko kuma karkatar da takin ko ma zagon-kasa ba.

“Jami’an gwamnati da a ka amince da su sayar da kayan, su tabbata sun raba shi daidai a dukkanin Kananan Hukumomi 17 na jihar,” in ji shi.

Ya kuma yi kira ga manoma da kada su sayar da takin saboda sun same shi a farashi mai sauki.