A ci gaba da kokarin da ake yi na tunkarar cutar korona, rundunar Sojojin sama ta Nijeriya (NAF) a ranar 3 ga Disamba, 2020, ta kaddamar da wani shirin horaswa na kwanaki 2 ga masana kimiyyar dakin binciken gwaje-gwaje kan amfani da injin ‘GeneDpert’ na gwajin cutar korona.
Wannan sanarwar ta fito ne daga hannun Daraktan hulda da jama’a da yada labarai na rundunar, Air Commodore Ibikunle Daramola, a inda yake cewa, da yake jawabi yayin bikin, Babban Hafsan sojojin sama (CAS), Air Marshal Sadikue Abubakar, wanda ya samu wakilcin Babban Hafsan a fannin jiragen sama na ‘Tactical Air Command’ (TAC), Air Commodore, Shehu Bakari, ya bayyana cewa, Kimiyyar ‘Laboratory Medical’ a matsayin daya daga cikin muhimman abubuwan na kowane tsarin kiwon lafiya, inda ya kara da cewa, NAF ta yi matukar saka jari ta fuskar sayen kayan aikin likitanci na zamani, inganta kayayyakin more rayuwa tare da inganta karfin masana kimiyyar dakin binciken ta.
Ya ci gaba da cewa, saboda barkewar annobar korona, NAF ta ga ya dace ta sayi kayan aiki na musamman don gwajin cutar. Wannan, in ji shi, an yi shi ne don baiwa ma’aikatan NAF damar bunkasa kwarewar da ake bukata domin bunkasa karfin gwajin su, musamman a aikin injinan ‘GeneDpert’, wanda za a tura zuwa Asibitocin NAF a duk fadin kasar.
A cewarsa, wannan shirin zai taimaka wajen dakile yaduwar korona a cikin kasa. Ya kuma sake nanata cewa, za kuma a iya amfani da injin ‘GeneDpert’ wajen gano wasu kwayoyin cuta kamar ‘Tuberculosis’, ‘Hepatitis B’ da C da tarin fuka, ma’ana ‘Flu birus’.
