Na Sake Dawowa Musulunci, Cewar JJC Skills

Fitaccen mawaki kuma dan wasan kwaikwayo, AbdulRasheed Bello, wanda aka fi sani da JJC Skills ya shelanta sake komawa Addinin Islama.

JJC Skills dai tsohon mijin jaruma, Funke Akindele ne, ya ayyana komawa Musulunci a shafukan sada zumunta a ranar Alhamis.

• Zargin Tarkon Bashi Ba Zai Katse Alakar Sin Da Kasashen Afirka Ba
• Harkokin Diplomasiyya Na Shugaban Kasar Sin A Shekarar 2022

JJC Skills wanda asalinsa a Addinin Musulunci aka haife sa amma bai taba rungumar Addinin, amma ya zabi ya bi addinin mahaifiyarsa wato Kiristanci, ya kara da cewa, “Na kasance cikin asara amma yanzu na rike Allah, ina rokon yafiyanka a nan duniya da lahira.

“Ya Allah ka lullube kura-kuraina, ka kareni a kowani yanayi ka kuma min yafiya don kada na halaka.”

Mawakin ya ce, yana matukar godiya wa Allah domin kuwa a yanzu haka ya musulunta ya rungumi umarnin Allah.

“An haifeni a matsayin Musulmi, sunana ma AbdurRasheed. Mahaifina Musulmi ne amma mahaifinta kirista ce. A da baya ina zuwa Islamiyya amma duk abun da na tuna kawai sai a zaneni da bulala. Sun kasance su na tsoratar da mu da wutar jahannama, don haka ban taba yin ibada ba.

“Amma cikin taimakon Allah yanzu na sake dawowa cikin addinin Islama gadan-gadan. Ina cike da godiyar da ya tsamoni ya ceto rayuwata.

“Ina cike da murna da farin ciki da na samu kaina cikin musulunci a halin yanzu saboda Islam na nufin zaman lafiya da salama. Tabbas na kasance a da baya cikin bata, amma yanzu kam na wadaka,” ya shaida.