NSCDC reshen Jihar Kano, ta kama wani matashi mai shekara 27 mai suna Yusuf Abdulrazaq bisa zargin yin ƙarya da matsayin jami’in hukumar tare da amfani da wannan damar wajen karɓar kuɗi daga jama’a ta hanyar yaudara da kurari.
Hukumar ta ce an kama wanda ake zargin ne a ƙauyen Rimin Auzinawa, da ke Ƙaramar Hukumar Ungogo, inda yake bayyana kansa a matsayin Assistant Superintendent of Corps I (ASC I), wani babban matsayi mai taurari biyu da ake cewa yana aiki a shalƙwatar hukumar ta jihar.
A cikin sanarwar da Kakakin Hukumar ta Kano, Ibrahim Abdullahi, ya fitar ranar Alhamis a madadin Kwamandan hukumar na jihar, Mohammed Agalama, ya ce binciken farko ya nuna cewa wanda ake zargin yana amfani da batun bibiyar wayoyin hannu da aka sace wajen karɓar kuɗi daga mutanen da ba su san gaskiyar lamarin ba.
Kwamandan hukumar ya gargaɗi jama’a da su riƙa tantance sahihancin duk wanda ya bayyana kansa a matsayin jami’in NSCDC, musamman waɗanda ke neman kuɗi bisa wasu dalilai da ake zargi. Ya kuma buƙaci mazauna jihar su kai rahoton duk wani motsi ko aiki da suka ga yana da shakku ga hukumomin tsaro.
A cewar sanarwar, wanda ake zargin yana hannun hukumar domin ci gaba da bincike da kuma yiwuwar gurfanar da shi a gaban kotu.
Hukumar ta sake jaddada cewa za ta ci gaba da kare rayuka da dukiyoyin jama’a tare da ɗaukar matakan da suka dace kan masu kwaikwayon jami’an tsaro.
