Wani mummunan hari da ake zargin ƴan ta’addar ƙungiyar Mamudawa ko Lakurawa ne suka kai kan ƙauyukan Wawilaiyi da Kystu da ke Ƙaramar Hukumar Koko/Besse ta Jihar Kebbi ya yi sanadin mutuwar wani Insfektan ƴansanda tare da fararen hula guda 11.
Rahotanni sun nuna cewa maharan sun shiga yankin ne a ranar Laraba, inda suka buɗe wuta ba ji ba gani tare da yin gumurzu da jami’an tsaro kafin su shiga yankunan da abin ya shafa.
Kakakin Rundunar Ƴansandan Jihar Kebbi, SP Bashir Usman, wanda ya tabbatar da faruwar lamarin ga manema labarai, ya bayyana cewa insfektan ƴansandan ya rasa rayuwarsa ne yayin da yake fafatawa da maharan domin kare al’umma.
Bayan kashe jami’in tsaron da fararen hula 11, ƴan ta’addar sun sanya wuta a gidajen mutane sannan suka kwashe kayan abinci daga shaguna, lamarin da ya tilasta wa ɗaruruwan mazauna yankin tserewa zuwa maƙwabtan garuruwa domin neman mafaka da tsira da rayukansu.
An tura tawagar jami’an tsaro da suka haɗa da ƴansanda da sojoji zuwa yankin da abin ya shafa domin dawo da kwanciyar hankali.
Rundunar ta ƙaddamar da bincike tare da aikin kakkabe dazuzzukan da ke kewaye domin gano maharan da suka aikata wannan ta’asa.
Hukumomin tsaro sun yi kira ga al’umma da su ci gaba da ba da haɗin kai ta hanyar bayar da bayanan sirri da za su taimaka wajen daƙile irin waɗannan hare-haren a nan gaba.
