Ci gaba daga makon da ya gabata…
Stanley ne ya fada min cewa ai idan ka tura wa Ciyaman aiki ya turo maka da sakon ‘Okay’ yana nufin an baka izinin ka ci gaba kenan. Ya dan kara min da wasu shawarwari game da wanne irin mutum ne Ciyaman, kuma ya ake zama da shi. Daga cikin abin da na rike sosai akwai batun cewa, Ciyaman na so ka rika takura mishi idan ya sa ka aiki; wanda a hankali na fahimci wannan.
Gabadaya labarin fushi da hayaniyar Ciyaman na ke ji a wurin wasu kafin wata ranar Talata, bayan mun yi kamar watanni hudu da fara aiki. Sai masu aikin kwamfuta suka hade kai suka ce ba za su yi aikin Jaridar Laraba ba, har sai an biya su albashinsu na wata biyu. Duk da na san da shirinsu, ni dai ban yi kasa a gwiwa wurin ci gaba da hada aiki ba, har zuwa yamma. Sannan ne na sanar da Stanley cewa, zan kira Ciyaman na sanar da shi halin da a ke ciki, domin kuwa idan har na yi shiru jaridar washegari ba ta fito ba, zan kasance cikin manyan masu laifi.
Da na lura Stanley nuku-nuku ya ke yi don ganin an sulhunta da masu aikin kwamfutan, kawai na dauki waya na jefawa Ciyaman tes. Kafin kyaftawar ido, sai ga kira. Ai kuwa nan ya hau fada, ya tambayeni ko M.D dinmu ya san da wannan boren. Ai kuwa na ce, eh. Sai Ciyaman ya kashe waya. A tunanina an gama, ashe da saura. Sai ga kiran Ciyaman ya kara shigowa. Ya ce, “Idan jaridar nan ba ta fito ba gobe na kori M.D dinku daga aiki”.
Hankalina a tashe na sake kiran Stanley, na sanar da shi yadda muka yi da Ciyaman. Nan da nan ya garzayo ofis. A haka aka yi ta maida magana tsakanin manyan ma’aikatan kamfanin. Wasu daga cikinsu sun yi ta ganin laifina akan bai kamata na sanar da Ciyaman halin da a ke ciki ba, domin su ya yi wa dirar mikiya. Amsa daya na yi ta ba su, “Idan jarida ba ta fito ba, ni ne Edita, kaina za ta kare.”
Tun farkon fara aikin, a duk lokacin da muka hadu da Ciyaman yabonmu ya ke yi. Wasu lokutan ma sai na dan ji kunya, yadda ya ke caccakar sauran ma’aikatan sashen turanci. Ya rika cewa, Yara sun zo sun fi ku sanin kan aiki. Wannan yabo da jinjinawa ta Ciyaman ta ja mana tsangwamar da ba iya bayyanata a fili, sai dai a bizne ta a zuciya.
Lokacin da aka zo maganar tafiya aikin Hajji na shekarar 2018 aka sanar da ni cewa ni ne zan tafi. Tabbas na ji dadin shaida biyu da aka bayar. Ta farko, Babban Manajin Daraktan LEADERSHIP, Abdul Gombe ya tambayi Shugabar sashen kudi shin idan ana so a karrama wani a sashen Hausa, wa ta ke ganin ya kamata. Sai ta kira sunana. G.M.D ya tambayeta ko mene ne dalili. Sai ta ce: “Bai taba cewa BA ZAI YIWU BA. Idan ka tambaye shi yaushe za a kawo aikin kudi, zai ce kudi sun kusa zuwa. Kuma yana kawowa din.”
Shaida ta biyu ita ce ta Ciyaman. Ko da na kira don sanar da shi cewa zan tafi Hajji. Idan kuma bana nan, Mataimakina na lokacin (Editan Jaridar LAHADI a yanzu), Malam Bello Hamza zai rike aikin har na dawo. Cikin harshen Ingilishi Ciyaman ya ce, “Ai na fada maka, gobenka tana da haske. Kuma za ka yi nisa a wannan harkar. Ka ci gaba da dagewa.”
Allah Sarki! Akwai watarana da na tafi Kano zance, lokacin ban yi aure ba. Na isa Kano ranar Juma’a, ina gidan su Matata da yamma sai ga kira daga Ciyaman yana tambayata ko ina gari. Na ce, mishi a’a, har da ‘yar guntuwar karya, na ce ina Kaduna alhali ina Kano. Sai kuwa ya ce, na zo yana nema na. Na ce, toh. Har ga Allah na yi niyyar na bari sai Lahadi sannan zan je na same shi. Ranar Asabar da safe sai ga kira daga Geoffrey (mutumin da ban taba ganin mai ji-ji da kai irinsa a LEADERSHIP ba), ya bukaci na tura masa adireshin I-mel dina. Ban ma tsaya tambayarsa dalili ba, na tura.
Bayan La’asar sai ga sakon I-mel daga Geoffrey, wai umurni daga Ciyaman, na zama Editan Jaridar LEADERSHIP ta turanci. Ina gani na kira Geoffrey a waya, na ce mishi ba zan yi ba. Nan fa ya harzuka, ya fara fada, yana cewa ai sai na kira Ciyaman na sanar da shi, “Kuma ka kwana da sanin babu wanda ya isa ya ki amsar umurnin Ciyaman.” Na katse shi mishi hanzari, na sake cewa, ba zan yi ba, zan kira Ciyaman din.
Na kira Ciyaman, yana dauka ya ce, me ya sa har yanzu ban zo ba. Na ce, zan zo, amma wannan takardar mukamin da aka buga bana jin zan yi. Sai ya ce, “don me? Ka zo ina jiranka. Karfe hudu na yamma na dauki Rabi’u Ali Indabawa muka bar Kano zuwa Abuja. Sai bayan Magriba muka bar Kaduna, ga shi ana ruwan sama, cikin zulumi haka muka yi ta nausawa a hankali. Ba mu shiga gidan Ciyaman ba sai karfe 11:30 na dare. A nan na kwakkwafe Ciyaman, har ya gamsu. Washegari sai ga sabuwar takarda, an fasa sabon mukamin da aka yi min. Wannan lamarin ya ba manyan ma’aikatan LEADERSHIP mamaki, tun lokacin suke kirana da ‘Mutumin Ciyaman’.
A cikin watan Maris din 2019 na je na samu Ciyaman a gida na yi mishi godiya kan damar da ya bani, sannan na bude jota dita, na fito da takardar ajiye aiki. Ya tambaye ni takardar mene ne? na ce, zan bar aiki, saboda zan kutsa wani fagen na daban. Ai fa nan Ciyaman ya kara sautin muryarsa, ya ce, ‘No! no, Sulaiman. Ban yarda ba’. Ko kallon takardar bai yi ba ma ballantana ya amsa. Ya ce, min ya yarda na yi duk wani abu da nake son yi, amma bai yarda na bar LEADERSHIP ba. Na ce, mishi zan bar kujerar Edita. Ya ce, ya yarda, amma ina da wadanda za su ci gaba? Na ce, eh. Duk sharadin da na kawo sai Ciyaman ya ce, ya yarda.
Tabbas! Mun yi zaman arziki da rabuwar arziki da Ciyaman. Duk zafin ransa da saurin fushi, bai taba zagina ba kamar yadda ya ke zazzage ma’aikatansa. Idan na ce ina son yin magana da wani Gwamna, Minista ko babban mutum, lamba yake aiko min. Sannan ya kan ce, idan na kira ba a dauka ba, na sanar da shi, zai yi min iso. Mako biyu kafin ya rasu ya bani wani aiki da nake ba shi rahoto kullum ta ‘Whatsapp’, hatta ranar Juma’ar da ya rasu sai da na tura. Sakon da bai bude ba kenan, ballantana mu tattauna.
