Ma’aikatar kula da cinikayya ta kasar Sin ta ce matakai na baya bayan nan na kamfanin Nexperia mai samar da abun hada laturoni na semiconductor dake da hedkwata a kasar Netherlands, wanda kuma mallaki ne na kamfanin Wingtech na kasar Sin, sun haifar da tsaiko ga gudanar ayyuka na yau da kullum. Ma’aikatar ta gargadi bangaren Netherlands cewa, dole ya dauki alhaki idan matakan suka haifar da karin rikici a masana’antar samar da semiconductor da ma tsarin samar da shi.
Wata sanarwa da ma’aikatar ta fitar jiya Asabar, ta mayar da martani ga tambayoyin manema labarai kan yadda kamfanin Nexperia ya katse hanyoyin gudanar da ayyuka na ma’aikatansa dake kasar Sin.
Ma’aikatar ta ce ta hanyar kokarin da ake yi tsakanin Sin da Netherlands, Wingtech da Nexperia suna tattaunawa domin warware rikicin cikin gida dake akwai.
Sai dai, ta hanyar katse hanyoyin gudanar da ayyuka na ma’aikatansa na kasar Sin, Nexperia ya takalo wani sabon rikici tare da haifar da sabbin cikas ga tattaunawar da ke gudana. (Mai fassara: FMM)
Discussion about this post