Muhawararmu ta wannan makon, ta karkata ne kan jin ra’ayoyin masu karatu, dangane da mulkin tsohon shugaban kasa, Muhammadu Buhari da kuma shugaba Bola Ahmed Tinubu, shin a tsakanin mulkinsu, wanne mutane suka fi samun walwala? SANI ANWAR da MUHAMMAD BAkIR ne, suka tattaro ra’ayoyin naku.
Ridwan Nuhu Mukhtar
Idan muka yi la’akari da walwalar talakan Nijeriya ta fuskar farashin abinci, fetur, sufuri da karfin sayen kudi, zamanin Buhari ya kasance da wasu saukakan yanayi fiye da farkon mulkin Tinubu, musamman saboda ci gaba da tallafin man fetur.Amma Buhari ma ya bar manyan matsalolin tattalin arziki, ciki har da faduwar naira, hauhawar farashi da rashin aikin yi.
Saboda haka, ba za a iya cewa Buhari ya magance matsalolin tattalin arzikin kasa ba. Abin da za a iya cewa shi ne, talaka ya fuskanci matsin tsadar rayuwa mafi tsanani a farkon mulkin Tinubu.
Abdulmalik B. Muhammad
Idan aka kwatanta mulkin Buhari da na Tinubu ta fuskar walwalar talaka, a zamanin Buhari mutane sun fi samun sauki a wasu abubuwa, musamman farashin fetur da sufuri saboda tallafin gwamnati. Amma a zamanin Tinubu, cire tallafin fetur da sauye-sauyen tattalin arziki, sun kara wa jama’a nauyin rayuwa.Duk da cewa, Tinubu ya kara albashi daga naira 30,000 zuwa 70,000, tsadar abinci da sauran bukatun yau da kullum, sun rage amfanin wannan karin albashi.
Babban abin fahimta shi ne: ingancin mulki ba a auna shi da yawan kudin da gwamnati ke samu, ana auna shi ne da yadda rayuwar talaka take inganta.
Sadik Suleiman
Bambancin mulkin Buhari da Tinubu shi ne, a zamanin Buhari an fi samun sauki wajen biyan wasu bukatun yau da kullum saboda tallafin man fetur, duk da matsalolin tattalin arziki da aka fuskanta. A zamanin Tinubu kuwa, an aiwatar da sauye-sauyen tattalin arziki wadanda suka kara tsadar rayuwa ga jama’a.Abin takaici shi ne, karin albashi ba ya wadatarwa idan farashin abinci, haya da sufuri na ci gaba da tashi.
Gwamnati mai inganci ita ce wadda manufofinta ke saukaka rayuwar talaka, ba wai kawai wadanda ke inganta alkaluman tattalin arziki ba.
Yusuf Muhammad
A nawa ganin, al’umma sun fi samun walwala a lokacin mulkin Buhari, idan aka kwatanta da na Tinubu, domin duk da cewa; matsin rayuwa ya fara kamari ne a zamanin Buhari, a mulkin Tinubu kuma abubuwa sun kara tsananta.Sai dai kuma, Tinubu ya bayyana cewa; zai dora ne daga inda Buhari ya tsaya. Don haka, ba za a iya tabbatar da cewa da Buhari ya ci gaba da mulki abubuwa ba za su kara lalacewa fiye da na Tinubu ba.
Abdullahi Umar
Magana ta gaskiya, an fi samun sauki tare da walwala a mulkin tsohon shugaban kasa Muhammad Buhari fiye da mulkin Shugaba Tinubu. Abubuwa da dama da suka hada da; tattalin arziki, tsaro da samun saukin rayuwa, sun dan fi dama-dama a lokacin Buhari, duk da cewa; da ma Tinubu ya bayyana cewa; zai dora ne a kan mulkin Buhari.
Amma fa batu na samun walwala, ‘yan Nijeriya ko kadan ba su samu yadda suke so ba, a karkashin mulkin APC kwata-kwata, idan ban da wahala da yunwa da matsalar rashin tsaro. Da Buhari da Tinubu, danjuma ne da danjummai ta fuskar rashin iya jagoranci da tausaya wa al’ummar da suke jagoranta. Wannan dalili ne ya kawo mu wannan hali na kunci da wahalhalu da muke ciki.
Safiyya Rabiu Ali Indabawa
A iya cewa mulkin Tinubu kamar ya fi dama-dama a kan na Buhari, koda-yake danjuma ne da danjummai, kuma ba wai na fada ne don ina son Tinubu ba, sai don wasu dalilai kamar haka:
Idan muka duba bangaren tsaro, a mulkin Buhari aka fara garkuwa da mutane, sannan a cikinsa ne aka rufe kan iyakokin Nijeriya har ta kai ga ana kashe mutane idan sun shigo da shinkafa daga waje, an hana shigo da shinkafa amma ba a hana shigo makamai ba, mutane sun ci ganyen Tafasa a zamaninsa wanda a yanzu ba a cin wannan kanye na Tafasa kwata-kwata a iya sanina. Sannan duk wannan yunwa da ake fama da ita a halin yanzu, shirin Buhari ne, kawai Tinubu ya zo ya dora ne, domin da kansa Buhari ya ce; idan ya sauka sai an ce gara mulkinsa da wanda zai zo nan gaba, ashe dama akwai wata kullalliya a kasa kenan. Ni wannan shi ne dalilina, sai dai kuma, ba na ra’ayin Tinubu kuma ba zan zabe shi ba, illa dai kawai na fadi gaskiya ne ko iyakar abin da na fahimta.
