Tawagar Super Eagles ta Nijeriya ta tashi daga birnin Uyo na Jihar Akwa Ibom zuwa Bissau, babban birnin Guinea-Bissau, domin karawa da mai masaukin baki a wasan neman gurbin shiga gasar cin Kofin Ƙasashen Afirka ta 2027. Za a buga wasan ne ranar Talata, 29 ga Satumba.
Tawagar Nijeriya, wadda ta lashe gasar sau uku a tarihi, ta bar Uyo da yammacin Lahadi bayan kammala atisayen da ta yi da safe a filin wasa na Godswill Akpabio International Stadium. Ƙungiyar ta fara atisayen ne da misalin ƙarfe 10:00 na safe kafin ta shirya tafiyar zuwa Bissau da misalin ƙarfe 3:00 na rana.
Super Eagles za ta yi amfani da jirgin Value Jet wajen tafiya zuwa Guinea-Bissau. A halin yanzu, ƙasashen biyu sun mallaki maki uku kowacce a rukunin L, bayan da Guinea-Bissau ta doke Tanzania da ci 2-0 a wasansu na farko, yayin da Nijeriya ta samu nasara da ci 2-1 a kan Madagascar.
An shirya wasan ne a filin wasa na Estádio 24 de Setembro da ke Bissau, inda za a fara da misalin ƙarfe 5:00 na yamma agogon Nijeriya. Kocin Super Eagles, Eric Chelle, zai jagoranci atisayen ƙarshe na tawagar gabanin wasan domin kammala shirye-shiryen ‘yan wasan.
Wasan na ranar Talata na da muhimmanci ga ƙasashen biyu, kasancewar kowacce na da maki uku kuma za ta nemi ƙarin maki domin ƙarfafa matsayinta a rukunin L na neman gurbin shiga AFCON 2027.
