Kano Pillars ya nuna aniyarsa ta komawa sahun gaba a gasar Firimiya ta Nijeriya (NPFL) ta bana, bayan da ya samu wata nasara mai muhimmanci a kan Nasarawa United a wasan mako na 11 da suka fafata a filin wasa na Sani Abacha da ke Kano.
Nasarar da ci biyu da babu ta sa “Sai Masu Gida” sun samu maki uku rigis, inda hakan ya ba su damar haurawa zuwa mataki na huɗu (4) a kan teburin gasar tare da tunkarar maki 18 daidai da jagoran teburin yanzu, wato Rivers United.
Takaitaccen Bayani Kan Tafiyar Ƙungiyar A Bana
A wasan na ranar Lahadi, ƴan wasan Kano Pillars sun nuna bajinta inda Yahaya Ibrahim da Fabian Nwori suka sanya sunayensu a jerin masu zura ƙwallaye. Wannan nasara ta kawo adadin nasarorin da ƙungiyar ta samu zuwa huɗu (4) tun farkon kakar wasan bana.
- Adadin Wasanni: Wasanni 11 da aka buga kawo yanzu.
- Nasarori: Wasanni 4.
- Canjaras: Wasanni 6.
- Rashin Nasara: Wasa 1 tilo.
Ƙalubale na Gaba da Fatan Magoya Baya
Yanzu haka dai tawagar ta Kano Pillars na shirin kai ziyara zuwa Jihar Imo domin fuskantar ƙungiyar ƙwallon ƙafa ta Kun Khalifa a birnin Owerri a karawar mako na 12 na gasar.
Wannan rawar gani da ƙungiyar ke nuna a kakar ta bana ta sanya zukatan magoya bayanta cike da ƙwarin gwiwa da fatan cewa, bayan shekaru 12 da suka shude ba tare da lashe kofin ba, wataƙila a bana ne za su sake dandanar daɗin ɗaga kofin gasar NPFL ta ƙasar nan.
