Tinubu Ya Ceto Nijeriya Daga Faɗawa Matsin Tattalin Arziƙi – Gwamna Namadi

Gwamnan Jihar Jigawa, Malam Umar Namadi, ya bayyana cewa sauye-sauyen tattalin arziƙi da Shugaba Bola Ahmed Tinubu ya yi musamman cire tallafin man fetur da sauya farashin dala sun ceci Nijeriya daga faɗawa cikin mummunan halin kuncin tattalin arziƙi. 

Ya ce ko da yake matakan sun fara jefa talakawa cikin wahala, amma yanzu haka suna samar da kuɗaɗen shiga da ake amfani da su wajen ci gaban ƙasa.

• Kotu Ta Yi Watsi Da Buƙatun Akpabio Kan Dakatar Da Sanata Natasha
• Rashin Tsaro: Gwamnatin Kogi Ta Gargadi Siyasantar Da Kalubalen Tsaro A Jihar

A cewar Namadi, Jihar Jigawa ta yi amfani da ƙarin kuɗaɗen shiga wajen gina sababbin hanyoyi sama da 47, gyara asibitoci fiye da 200, da kuma ɗaukar sabbin malamai da dubban ma’aikatan lafiya.

Ya ƙara da cewa harkar noma, samar da ruwa da walwalar al’umma sun inganta sosai sakamakon waɗannan kuɗaɗe, lamarin da ke sauƙaƙa rayuwar talakawa.

Gwamnan ya kuma ce bunƙasa da Naira ke samu a halin yanzu yana taimakawa wajen daidaita tattalin arziƙin ƙasa da jawo hankalin masu zuba jari.

A cewarsa, shuwagabancin Tinubu ya gina tubalin ci gaba mai ɗorewa ta hanyar yanke hukunci masu wahala amma masu amfani.

Dangane da sauyin jam’iyyun siyasa da ke faruwa, Namadi ya ce yawaitar sauya sheƙa zuwa jam’iyyar APC alama ce da ke nuna yadda jama’a ke ƙara amincewa da shugabancin Tinubu da kuma burin da yake shi ga ƙasar nan.

Ya ce masu barin jam’iyyunsu suna haka ne domin suna ganin makoma mai kyau a ƙarƙashin jagorancinsa.

Har ila yau, Namadi ya bayyana cewa ziyarar aikin da ya kai Indiya kwanan nan ta samar da muhimman yarjejeniyoyi da masu saka jari da ƙwararru don bunƙasa harkar noma a Jihar Jigawa.

Ya ce an cimma matsaya a fannoni irin su kiwon shanu, kiwon kaji da samar da ingantattun iri, wanda zai ƙara samar da ayyukan yi, tsaro na abinci, da kuma ɗora Jigawa zuwa cibiyar noma ta ƙasa.