Daga Abdullahi Muhammad Sheka,
A jiya Alhamis ne aka wayi gari da ganin dandazon jami’an tsaron farin kaya, ‘yan sanda, da jami’an tsaron fararen hula sama da motoci biyar wadanda aka girke su a kofar gidan malamin nan mai wa’azi a Kano Sheikh Abduljabbar Nasiru Kabara wanda ke Unguwar Gwale a birnin Kano.
Hakan dai manuniya ce kan cika umarnin da gwamnatin jihar ta bayar na hana shi wa’azi. Sai dai jami’an tsaron da aka ganin, ba sa hana masu zuwa jajantawa shiga gidan malamin. Haka kuma akwai daruruwan magoya bayan malamin a kusa da Masallacinsa lokacin da wakilinmu ya garzaya yankin domin gane wa idonsa abin da ke faruwa.
A ranar Laraba ce Gwamnatin Jihar Kano ta haramta wa Sheikh Abduljabbar Nasiru Kabara wa’azi tare da ba da umarnin rufe masallacinsa, sakamakon zargin kalaman batanci da yake yi ga Sahabban Annabi (SAW).
Kwamishinan Ma’aikatar Yada Labarun Jihar Kano, Malam Muhammad Garba ya yi wa manema labarai bayanin hakan a Fadar Gwamnatin Jihar Kano, jim kadan bayan kammala taron majalisar zartarwar jihar.
Garba ya ce, gwamnatin jihar ta kuma umarci Kwamishinan ‘Yan Sandan na Kano da sauran hukumomin tsaro su tabbatar da ganin an yi biyayya tare da kiyaye wannan umarni. Ya kara da cewa, an zartar da daukar wannan matakin ne a lokacin zaman majalisar zartarwar na mako-mako da aka saba yi.
Wakazalika, an umarci dukkanin kafafen yada labaru na rediyo da talbijin da ke fadin jihar ta Kano su dakatar da yada duk wani wa’azi na Sheikh Abduljabbar ko wata hudubarsa, ba tare da wani bata lokaci ba.
Kwamishinan ya ce, an dauki wannan matakin ne domin kauce wa barkewar rikici ko karya doka da oda a fadin jihar ta Kano.
A ‘yan kwanakin nan an sha jin Sheikh Abduljabbar na fitar da wasu fatawowi da ake zargin na batanci ne ga Sahabban Annabi (SWA), inda ya cigaba da jaddada matsayarsa kan abin da yake ambatawa, wanda hakan ya sa manyan malamai a Jihar Kano da ma wasu na kasa baki-daya suke ta faman kiraye-kirayen hukumomi su yi gaggawar daukar mataki kan lamarin domin riga-kafin barkewar rikici.
Sai dai kuma, LEADERSHIP A Yau Juma’a ta nakalto shugaban Kungiyar Izalatul Bid’a wa Ikamatis Sunnah mai shalkwata a garin Jos, reshen Jihar Kano, Sheikh Sani Sharif Bichi, ya bayyana cewa kafin daukan wannan matakin akwai abin da ya kamata gwamnatin jihar ta yi.
A nashi hangen, ya bai wa gwamnatin jihar shawarar cewa, kafin a dauki dakatar da Sheikh Abduljabbar, kamata ya yi a kira shi a zauna da shi da almajiransa da kuma wadanda ya kira da “dakarun Sunnah” a ji ta bakin kowa.
A cewarsa ba zai yiwu a ce mutum ba shi da aiki sai “zagin sahabban Annabi” a gari kamar Kano garin Musulunci ba, In ji shi.
Sheikh Sani Sharif Bichi ya kawo misalin cewa Abduljabbar a ina ya san Anas bin Malik, idan babu shi a ina zai san sunansa?
Malamin na wannan jawabi ne a wurin taron kara wa juna sani da aka gudanar a Masallachin Juma’a na Tal’udu da ke Kano.
Shi kuwa wani mabiyin Sheikh Abduljabbar mai suna Usman Aljabary cewa ya yi rufe Masallachin Abduljabbar tauye hakkin “miliyoyin” mabiyansa ne, yana mai cewa “malaman Tijjaniyya da Salafiyya sun kasa kare Littafan Hadisai na Sahihul Buhari da Sahihu Muslim sai Ganduje?”.
Sai dai kuma, a cikin wani fafaifan bidiyo na Yutube da Sheikh Abduljabbar ya fitar ya hakurkurtar da mago bayansa da suka halarci taron da ya yi a dakin karatun da ke gidansa inda yake shaida wa daliban nasa cewa su yi biyayya ga doka da oda kamar yadda shi ma yake yi.
Haka nan an ji yana barazana ga wasu malamai inda yake cewa, “…amma dai ina yi muku rantsuwa da Allah idan Shehi Shehi ko Abdulwahab wani ya yi gangancin turo ‘ya’yan wasu suka hauro mana wannan wurin za mu danne mutum ‘mu yanka’,” in ji shi.
Duk kokarin da wakilinmu ya yi na jin ta bakin Sheikh Abduljabbar abin ya ci tura, kasancewar ya buga lambar wayarsa ta ki shiga, sannan ya aike da sakon kar-ta-kwana shi ma babu amsa ba.
Sai dai kuma, a hirar da jaridar Daily Trust ta yi da Abduljabbar a ranar Laraba, ya bayyana cewa matakin da gwamnatin Kano ta dauka a kansa yana da nasaba da siyasa.
Har ila yau, wakilinmu ya yi kokarin jin ta bakin bangaren wasu malamai da Abduljabbar ya fi kalubalanta amma kowa ya tsuke bakinsa kan al’amarin.
…Yanzu Muka Fara Daukan Mataki A Kansa – Ganduje
Gwamna Abdullahi Umar Ganduje, ya bayyana cewa hana karatuttukan Sheikh
AbdulJabbar Nasiru Kabara a Masallacinsa da ragowar wurare, somin-tabi ne domin
yanzu suka fara daukan mataki a kansa, don akwai abubuwan da za su biyi baya.
Gwamnan ya bayyana haka ne a wani taro na musamman da ya kira dukkan bangarori
na malamai da kuma limaman Juma’a, wanda a ka yi a dakin taro na Africa House da
ke gidan Gwamnati, jiya Alhamis.
Ya ce “Da can mu na ta jin abubuwan da a ke fada sai muka ce a kawo mana hujja kan
hakan. Muna samun hujja sai muka dauki mataki kamar yadda aka fara gani.”
Ya kara da cewa “Wannan hobbasa, ba na Gwamnati ba ne ita kadai. Ta mu ce gaba
daya. Babban abin haushin ma shi ne, bayan karuwar faruwar irin wannan abu, sai ya
zamana ma cewar abin yana ma kara zurfi. Idan aka yi la’akari da yadda wannan abin
ya faru.”
Gwamnan ya shawarci limaman Juma’a da cewar ya kamata hudubobinsu na sallar
Juma’ar yau su mayar da hankali kan wannan magana da ake ciki.
“Ya kamata a kara nuna wa al’umma munin wannan babban al’amari. Da kuma neman
karin addu’o’i daga al’umma kan cewa Allah ya sa wadannan matakan da mu ke dauka
su zame mana dalilin tsira gobe kiyama.”
Sa’annan ya kara da cewa zai ci gaba da zama da malaman saboda tuntubarsu kan
yadda abin zai dinga tafiya. Ya kuma kara neman goyon bayan al’umma da ci gaba da
yi wa jihar ta Kano addu’o’i kamar yadda a ka saba yi.
Daga cikin malaman da su ka tofa albarkacin bakinsu, sun hada da dan’uwan
AbdulJabbar na jini, wato Alkali Mustapha Sheikh Nasiru Kabara, wanda ya bayar da
shawarar cewar “Wannan
