A yau Laraba, 29 ga watan Janairu, 2025, ƙasashen Nijar, Mali, da Burkina Faso wa’adin ficewarsu daga Ƙungiyar Raya Tattalin Arziƙin Ƙasashen Yammacin Afirka (ECOWAS) ya cika.
A watan Janairun na bara ne ƙasashen uku suka sanar da aniyarsu na ficewa daga ECOWAS, bayan sun zargi ƙungiyar da yin biyayya ga Faransa.
- Gwamnan Bauchi Ya Rantsar Da Mashawarta 11, Ya Horesu Da Aiki Tuƙuru
- Gwamnan Bauchi Ya Sanya Hannu Kan Dokar Da Za Ta Daƙile Satar Yara A Bauchi
Daga bisani, suka kafa sabuwar ƙungiya mai suna Haɗin Kan Ƙasashen Sahel (AES).
A yayin taron shugabannin ECOWAS da ya gudana a Abuja a watan Disamban 2024, ƙungiyar ta amince da ficewar ƙasashen uku, tare da ba su wa’adi domin sake tattaunawa da yiwuwar komawarsu cikin ECOWAS.
Bugu da ƙari, kasashen AES sun sanar da kafa rundunar soji ta haɗin gwiwa mai ɗauke da sojoji 5,000, tare da kayan aikin sama da na ƙasa, domin yaƙi da ƙungiyoyi masu iƙirarin jihadi da ke addabar yankin Sahel.
Duk da ficewarsu daga ECOWAS, ƙasashen AES sun yanke shawarar cewa ‘yan ƙasashen ECOWAS za su iya shiga ƙasashensu, domin ƙarfafa dangantakar hada-hadar kasuwanci a tsakanin yankin.
Wannan ficewa na zuwa ne a daidai lokacin da ƙasashen Sahel ke fama da matsalolin tsaro, wanda ya haifar da juyin mulki a ƙasashen uku.
Yanzu haka, suna fatan sabuwar ƙungiyarsu ta AES za ta taimaka wajen magance waɗannan matsaloli da inganta tsaro a yankin.
