Gwamnan Jihar Zamfara, Dauda Lawal ya jaddada buƙatar yin riƙo da gaskiya da riƙon amana a harkokin gudanar da mulki, inda ya buƙaci ɗaukacin ’yan majalisar zartarwar jihar da su ba da fifiko wajen gudanar da ayyukansu a kan haka.
A ranar Litinin ne gwamnan ya jagoranci zaman majalisar zartarwa ta Jihar, wanda aka gudanar a zauren majalisar da ke gidan gwamnati a Gusau.
Mai magana da yawun gwamnan, Sulaiman Bala Idris ya bayyana cewa majalisar ta tattauna batutuwa daban-daban da suka shafi ci gaban jihar kamar samar da ababen more rayuwa, kiwon lafiya, ilimi, da kuma tsaro.
A cewar sanarwar, wannan shi ne taron majalisar zartarwa karo na goma sha takwas tun bayan da aka ƙaddamar da “shirin ceto Zamfara.”
Majalisar ta tattauna kan ci gaban da aka samu a fannin samar da ababen more rayuwa, kiwon lafiya, ilimi, da tsaro da dai sauransu.
A wajen taron, Gwamna Lawal ya jaddada aniyar gwamnatinsa ta ganin jihar ta cimma manufofinta na ci gaban al’umma.
Gwamnan ya ja hankalin ’yan majalisar kan su kasance masu himma da ƙwazo wajen gudanar da ayyukansu.
Bugu da ƙari, an gabatar wa majalisar ta Zamfara da cikakken rahoto kan halin da ake ciki na aikin gyaran sakatariyar jihar da ake yi. Rahoton ya bayar da cikakkun bayanai kan ci gaban da aka samu kawo yanzu, ciki har da kammala aikin gyare-gyare kashi na farko.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
